Goa Farm: घटत्या लागवड क्षेत्राचा सरकारी धोरणावर परिणाम..भात, डाळी उत्पादनात चढउतार

विलास ओहाळ

राज्यात मुख्यमंत्री डॉ. प्रमोद सावंत सरकारने शेती क्षेत्रात स्वयंपूर्णता आणण्याचे ठरवले असले तरी लागवडीचे घटते क्षेत्र पाहता ते स्वप्न सत्यात येणे अशक्यप्राय वाटते. राज्यात खरीप आणि रब्बी हंगामात शेती केली जात असली तरी मागील 2020-21, 2021-22 व 2022-23 या तीन वर्षांच्या पीक लागवड क्षेत्राचा विचार केला तर भात क्षेत्र आणि डाळी उत्पादन क्षेत्रात चढउतार दिसून येत आहे.

कृषी संचालनालयाकडून प्राप्त झालेल्या आकडेवारीवरून, भुईमूग लागवड क्षेत्र २०२०-२१मध्ये ७४ हेक्टर आणि उत्पादन १६५ मे.टन होते. २०२१-२२मध्ये लागवड क्षेत्र ७९ हेक्टर व उत्पादन १६० मे.टन होते. हे लागवड क्षेत्र सरासरी ७० हेक्टरवर राहिले. २०२२-२३ मध्ये लागवड क्षेत्र ६७ हेक्टर व उत्पादन १०६ मे.टन झाले आहे .

काजू लागवड क्षेत्रावर नजर टाकली तर त्यातही किंचितसा चढउतार दिसून येतो. २०२०-२१ मध्ये लागवड क्षेत्र ५६,८२९ हेक्टर व उत्पादन २७,३६६ मे.टन होते.

२०२१-२२ मध्ये लागवड क्षेत्र ५६,८९० हेक्टर व उत्पादन २६,०३२ मे.टन होते आणि २०२२-२३ मध्ये लागवड क्षेत्र ५६,९३४ हेक्टर व उत्पादन २५,८०० मे.टन झाले आहे.

शेतकऱ्यांचा अळंबी उत्पादनाकडे कल

अळंब्यांना हॉटेल व नागरिकांकडून मागणी असल्याने अळंबी उत्पादनाला चालना मिळाली आहे. त्यामुळे अनेक जुने शेतकरी किंवा नवीन शेतकरी अळंबी उत्पादन करू लागले आहेत. २०२२-२३ मध्ये ६,२०४ मे.टन अळंब्यांचे राज्यात उत्पादन झाल्याचे दिसून येते.