दक्षिण गोव्यातील दाबोळी विमानतळावरून एका धक्कादायक बातमी समोर आली आहे. दाबोळी विमानतळावर उतरणाऱ्या एका आंतरराष्ट्रीय विमानात बॉम्ब असल्याचा एक फोन पोलिसांना आला असून, संबधित फ्लाईट जामनगर, गुजरात येथे वळविण्यात आली आहे. या फ्लाईटमध्ये 244 प्रवाशी असल्याची माहिती समोर आली आहे. हे विमान रशियातील मॉस्को येथून गोव्याला येत होते.
याबाबत मिळालेल्या अधिक माहितीनुसार, या फ्लाईटचे जामनगर विमानतळावर इमर्जन्सी लँडिंग करण्यात आले आहे. जामनगर जिल्ह्यातील सर्व उच्च अधिकारी विमानतळावर पोहोचले आहेत. फ्लाइटमध्ये अनेक परदेशी प्रवासी आहेत. जामनगर येथील प्रशासकीय अधिकारी, पोलिस यांनी या घटनेची गांभीर्याने दखल घेतली असून, विमानाची तपासणी सुरू आहे. सध्या जामनगर विमानतळाच्या आत बाहेरील व्यक्तींच्या प्रवेशावर बंदी घालण्यात आली आहे. जामनगरचे जिल्हाधिकारी आणि जिल्हा पोलिस प्रमुखांसह अधिकारी विमानतळावर पोहोचले आहेत.
गोवा पोलिस देखील या घटनेमुळे सतर्क झाले असून, दाबोळी विमानतळावर पोलिसांचा मोठा बंदोबस्त तैनात करण्यात आला आहे. तसेच, पोलिसांची उच्च बैठक देखील सध्या सुरू आहे.
दरम्यान, जामनगर येथे विमानाचे 9.49 वा सुरक्षित लॅन्डिंग करण्यात आले असून, सध्या हे विमान आयसोलेशन मध्ये आहे. सर्व प्रवाशी सुखरूप आहेत. अशी माहिती समोर आली आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.