Western Bypass Accident: रस्त्याच्या लोकार्पणानंतर तासाभरात अपघात; कारण अस्पष्ट

सासष्टी: पश्र्चिम बगल रस्ता पूर्णपणे वाहतुकीसाठी खुला केल्याने मडगाव व परिसरातील वाहतुकीची जी कोंडी होत होती ती आता पूर्णपणे बंद होईल असं म्हटलं जातंय. या रस्त्याचा शुभारंभ म्हणजे दक्षिण गोव्यातील लोकांना नाताळ व नववर्षाचे गिफ्ट असल्याचे मुख्यमंत्री डॉ. प्रमोद सावंत यांनी पश्रिम बगल रस्त्याचे उद्‌घाटन करताना म्हटले मात्र सोमवारी केवळ एका तासाभरात या रस्त्यावर पहिल्या अपघाताची नोंद झाली.

बाणावली ते सुरावली रस्त्यावर एका क्रेन आणि चारचाकीमध्ये हा अपघात झाला. अपघातानंतर स्थानिकांनाही तातडीने घटनास्थळी धाव घेत अपघाताचे प्रमुख कारण शोधण्याचा प्रयत्न केला मात्र अद्याप या अपघाताचे कारण समोर येऊ शकलेले नाही.

१२ किमी अंतराच्या रस्त्यासाठी एकूण ४८२ कोटी रुपये खर्च आलाय . त्यातील केंद्राकडून २४७ कोटी व गोवा सरकारने २३५ कोटी रुपयांचा भार उचलला आहे. सोमवारी हा २.७५ किमी अंतराचा रस्ता वाहतुकीसाठी खुला करण्यात येत आला, उर्वरित रस्ता यापूर्वीच वाहतुकीसाठी खुला करण्यात आला होता.

सोमवारी झालेल्या नवीन रस्त्याच्या उद्‌घाटन सोहळयाला पर्यावरण व कायदामंत्री आलेक्स सिक्वेरा, माजी मुख्यमंत्री व मडगावचे आमदार दिगंबर कामत, फातोर्डाचे आमदार विजय सरदेसाई, मडगावचे नगरसेवक व सार्वजनिक बांधकाम खात्याचे अधिकारी उपस्थित होते.