म्हापसा गोळीबारप्रकरणी तिघांना जामीन मंजूर

म्हापसा : येथील कथित गोळीबार प्रकरणात अटक केलेल्या तीन संशयित आरोपींना म्हापसा जीएमएफसी कोर्टाने प्रत्येकी 20 हजार रुपयांच्या जातमुचलक्यावर सशर्त जामीन मंजूर केला. तर, बस्तोडा उड्डाणपुलावर एका प्रवाशाला अटकाव करीत दहशत माजवल्याप्रकरणी न्यायालयाने या तिघांना जामीन मंजूर केला होता.

माहितीनुसार, गुरुवारी (2 जून) पहाटे म्हापसा येथे हवेत गोळीबार केल्याप्रकरणी धुळेर येथील एका व्यक्तीस मद्यधुंद अवस्थेत अटक केली होती. त्यापूर्वी बस्तोडा येथील उड्डाणपुलावर एका प्रवाशाकडे दहशत माजवणार्‍या त्याच्या दोन साथीदारांनाही म्हापसा पोलिसांनी अटक केली होती.

ज्यात संशयित जेम्स सौझा, विनायक सोमजी व विल्यम रॉड्रिग्स या तिघांविरुद्ध दोन वेगवेगळे गुन्हे दाखल केले होते. पोलिसांनी भादंसंच्या कलम 341, 324, 170, 506(2) व 34 अन्वये आणि भादंसंच्या कलम 336 व शस्त्र कायदा कलम 25, 27 व 30 नुसार आरोपींविरुद्ध गुन्हे नोंदवले होते.

शहरात सार्वजनिक ठिकाणी गोळीबार केल्याप्रकरणी पोलिसांनी अटक केलेल्या तीन संशयितांना म्हापसा जीएमएफसीने 14 दिवसांच्या न्यायालयीन कोठडीत पाठवले होते. त्यानंतर, पहिल्या प्रवासी प्रकरणात जामीन अर्ज दाखल करण्यात आला आणि प्रत्येकी 20 हजार रुपयांच्या जामीनाच्या जातमुचलक्यावर सशर्त जामीन शनिवारी मंजूर करण्यात आला. तर, शस्त्रास्त्र कायद्याप्रकरणी जामीन अर्जावर सुनावणी होऊन मंगळवारी संबंधितांना जामीन मंजूर करण्यात आला.