Mapusa Short Circuit: म्हापशात शॉर्ट सर्किटमुळे आग; ५ लाखांचे नुकसान

म्हापसा: फेअरा, बाईक्सा, म्हापसा येथील रिलायबल प्रिन्टर्स या दुकानाला शॉर्ट सर्किटमुळे आग लागण्याची घटना गुरुवारी घडली. या दुर्घटनेत ५ लाखांचे आर्थिक नुकसान झाले. हे दुकान नीलेश सांगोडकर यांच्या मालकीचे आहे.

उपलब्ध माहितीनुसार, येथील ओम चेबर्स इमारतीमधील रिलायबल प्रिन्टर्स या दुकानाला शार्ट सर्किटमुळे आग लागली. यात दुकानातील संगणक, प्रिंटरसह इतर इलेक्ट्रॉनिक उपकरणे जळाल्याने ५ लाखांचे नुकसान झाले. ही घटना गुरुवारी पहाटे २च्या सुमारास घडली.

शॉर्ट सर्किटमुळे दुकानाच्या दर्शनी केबिनमध्ये सर्वप्रथम आग लागली. एसी, लॅपटॉप, प्रिन्टर, टीव्ही स्क्रीन, सीसीटीव्ही कॅमेरा, टेबल, खुर्ची व इतर विद्युत्त उपकरणे आगीच्या भक्ष्यस्थानी पडली. सुदैवाने ही आग दुकानाचा पोटमाळा तसेच आतील केबिनमध्ये पसरली नसल्याने मोठी हानी टळली.

या दुर्घटनेत अंदाजे ५ लाखांचे नुकसान झाल्याची माहिती दुकानमालक नीलेश सांगोडकर यांनी दिली. घटनेच्यावेळी मुसळधार पाऊस पडत होता. त्यामुळे दुकानाला आग लागल्याचा अंदाज इमारतीमधील कुणालाही आला नाही. वीज कर्मचाऱ्यांनी घटनास्थळी भेट देऊन पाहणी केली.