Canacona Fire: काणकोण मामलेदार कार्यालयातील आगीत अनेक जुने दस्तऐवज खाक; घटनेबाबत संशय

Canacona Mamledar Office Fire: काणकोण येथील मामलेदार कचेरीत लागलेल्या आगीत अनेक जुने दस्तऐवज खाक झाल्याची माहिती आहे. ही आग फार मोठी नव्हती, मात्र महत्वाचे, जुने अनेक दस्तऐवज या आगीच्या भक्ष्यस्थानी पडल्याचे समजते. त्यावरून या घटनेबाबतच संशय व्यक्त केला जात आहे.

सोमवारी मध्यरात्री ही आग लागली होती. काही कर्मचारी रात्री ड्युटीवर होते. आगीवर नियंत्रण मिळवेपर्यंत बरेच दस्तऐवज जळून गेले होते. शॉर्ट सर्किटमुळे ही आग लागल्याचा संशय व्यक्त केला जात आहे. आगीच्या कारणांचा शोध घेतला जात आहे.

दरम्यान, या आगीबाबत संशय व्यक्त केला जात आहे. गेल्या काही काळामध्ये राज्यात जमिनी हडप करण्याचे प्रकार घडले आहेत. यातील काही प्रकरणांची चौकशी एसआयटीमार्फत केली जात आहे. एक सदस्यीय आयोगही या प्रकरणांची चौकशी करणार आहे.

त्या पार्श्वभुमीवर या आगीमध्ये येथील काही जमिनींची कागदपत्रे जळून गेली आहेत. या कागदपत्रांमध्ये फेरफार नोंदीची कागदपत्रे होती, असे समजते. फेरफार कागदपत्रांमधून जमिनीच्या मालकीचा इतिहास कळत असतो.

नेमकी हीच कागदपत्रे जळाल्याने या आगीबाबत संशय व्यक्त होत आहे. आग लागली की लावली गेली, जाणीवपूर्वक तर आग लावली गेली नाही ना, याचा तपास करावा, अशी चर्चा रंगली आहे.