Mahadayi River Dispute : शाहांच्या विधानावर CM सावंत यांची पहिली प्रतिक्रिया; म्हणाले, गोवेकर लवकरच...

Mahadayi Water Dispute : केंद्रीय जलआयोगाने कळसा-भांडुराच्या सुधारित प्रकल्प आराखड्याला मंजुरी दिल्यामुळे राज्य सरकारला म्हादई नदीच्या पाणी प्रश्‍नाबाबत जोरदार झटका मिळाला असतानाच गोव्याच्या संमतीनेच म्हादई पाणी वाद मिटवला, असे अत्यंत वादग्रस्त आणि धक्कादायक विधान केंद्रीय गृहमंत्री अमित शहा यांनी हुबळीतील सभेत केल्यामुळे गोव्यात एकच खळबळ उडाली आहे.

यावर गोव्याचे मुख्यमंत्री डॉ. प्रमोद सावंत यांनी एक नवे विधान केले आहे. ते म्हणाले की, गोव्याचा म्हादईबाबतचा कायदेशीर लढा भक्कम असून याबाबत लवकरच गोवेकरांना परिणाम पाहायला मिळतील. त्यामुळे मी गोवेकरांना ही खात्री देतो की आमचे सरकार नक्कीच गोवेकरांचे हित जपणारे आहे.

मुख्यमंत्र्यांच्या या विधानामुळे पुन्हा एकदा नागरिकांमध्ये संभ्रमावस्था निर्माण झाली आहे. एकीकडे केंद्रस्तरावर असे बोलले जात आहे की, म्हादई वळवण्याचा निर्णय हा गोव्याच्या संमतीनेच घेतला गेला आहे; तर दुसरीकडे मुख्यमंत्री गोवेकरांना आश्वासनांवर आश्वासने देत आहेत.

नागरिकांनी नेमका विश्वास ठेवायचा तरी कशावर हाच मोठा प्रश्न आहे.