Dengue fever: वास्कोत डेंग्यू संसर्गाची भीती

Dengue fever वास्कोत पुन्हा एकदा डेंग्यू संसर्गाची भीती निर्माण झाली आहे, कारण ब्लू बॅरल पाणी साठवण्याची पद्धत सुरू असल्याचे आढळले आहे. 2021 मध्ये मुरगाव तालुक्यातील वास्को आणि कुठ्ठाळी येथे ब्लू बॅरलमध्ये पाणी साठवून ठेवण्याच्या प्रकाराच्यामुळे परिसरात डेंग्यूने थैमान घातले होते.

आरोग्य खात्याने जागृकता आणि तपासणी करून पद्धत बंद केल्याने डेंग्यू बऱ्यापैकी नियंत्रणात आला होता, परंतु आता ही नवीन माहिती समोर आल्यानंतर चिंता वाढली आहे. 2021 मध्ये वास्कोतील सडा वाटारात ब्लू बॅरलचा प्रकार सुरू असल्याने मोठ्या संख्येत डेंग्यूचे रुग्ण आढळले होते.

तेव्हा आरोग्य खात्याच्या कर्मचाऱ्यांना माहिती शिक्षण संवाद (आयईसी) माध्यमातून दारोदारी तपासणी करून स्रोतचा शोध लावून परिस्थिती नियंत्रणात आणली होती. आता देखील याच उपाय योजना करायला लागणार आहेत. बऱ्याचदा परप्रांतीय मजुराना भाडेपाट्टीवर दिलेल्या घरांमध्ये पाणी साठवून ठेवण्याची पद्धत आहे.

कधी कधी ते घर बंद करून जातात, त्यासाठी घराची एक अतिरिक्त चावी घरमालकाकडे असणे महत्त्वाचे आहे. डेंग्यूसाठी काळजी घेण्याची आवश्यकता आहे, अशी माहिती राष्ट्रीय संसर्गजन्य आजार कार्यक्रमाच्या गोव्यातील मुख्य अधिकारी डॉ. कल्पना माहात्मे यांनी दिली.