Indian Super League: इंडियन सुपर लीग (आयएसएल) फुटबॉल स्पर्धेत रविवारी (ता. 14) फातोर्ड्यात एफसी गोवाने चेन्नईयीन एफसीला हरविले आणि सोमवारी (ता. 15) मोहन बागानला हरवून मुंबई सिटीने लीग विनर्स शिल्डचा मान मिळविल्यास गोव्यातील संघ स्पर्धेत दुसरा क्रमांक पटकावेल आणि थेट उपांत्य फेरी गाठेल.
दरम्यान, एफसी गोवासाठी स्पर्धेतील बाकी दोन लढती खूपच महत्त्वाच्या आहेत. प्रत्येकी 21 सामने खेळल्यानंतर मुंबई सिटीचे 47 गुण, मोहन बागानचे 45 गुण, तर एफसी गोवाचे 42 गुण आहेत. सुरवातीला उल्लेखलेले जर-तर प्रत्यक्षात आल्यास साखळी फेरीअंती एफसी गोवा व मोहन बागान यांचे समान 45 गुण होतील. यंदा स्पर्धेत एकमेकांविरुद्धच्या लढतीत एफसी गोवा सरस असल्याने कोलकत्यातील संघ तिसऱ्या स्थानी राहील व त्यांना प्ले-ऑफ बाद फेरीत खेळावे लागेल. मुंबई सिटी व मोहन बागान यांच्यातील सामना बरोबरीत राहिल्यास साखळी फेरीअंती मुंबईतील संघ शिल्ड विजेता, तर कोलकत्यातील संघ उपविजेता ठरेल आणि एफसी गोवाला प्ले-ऑफ बाद फेरीत खेळावे लागेल.
दुसरीकडे, फातोर्ड्यात रविवारी एफसी गोवा व चेन्नईयीन एफसी यांच्यासाठी साखळी फेरीतील शेवटचा सामना असेल. मानोलो मार्केझ यांच्या मार्गदर्शनाखालील संघ सलग सहा सामना अपराजित आहेत, तर ओवेन कॉयल यांच्या मार्गदर्शनाखालील चेन्नईयीन एफसीने ओळीने तीन सामने जिंकून स्पर्धेच्या प्ले-ऑफ फेरीसाठी पात्रता मिळवली आहे. सध्या त्यांचे 21 सामन्यांतून 27 गुण असून ते सहाव्या क्रमांकावर आहेत.
सामन्याच्या पूर्वसंध्येला शनिवारी पत्रकार परिषदेत एफसी गोवाचे प्रशिक्षक मार्केझ यांनी सांगितले, की `आम्हाला जिंकायचेच असून विजय अत्यावश्यक आहे. समजा, रविवारी आम्ही जिंकलो नाही आणि कोलकत्यात (मोहन बागानविरुद्ध) मुंबईने (सिटी) विजय नोंदविल्यास आमच्यावर पश्चातापाची वेळ येईल. चेन्नईयीनसाठीही बाकी एक सामना महत्त्वपूर्ण आहे. तुलनेत आमच्यासाठी लढत खूप महत्त्वाची आहे, कारण आम्हाला अजूनही साखळी फेरीअंती दुसऱ्या स्थानी राहण्याची चांगली संधी आहे. जरी आम्ही इतर निकालावर अवलंबून असलो, तरी आम्हाला जिंकावेच लागेल.`
एफसी गोवासमोर खेळाडूंच्या यलो कार्डचे संकट आहे. संघाच्या बचावफळीत स्थिरावलेला सेंटर बॅक खेळाडू निम दोरजी तमांग स्पर्धेत चार यलो कार्डमुळे चेन्नईयीन एफसीविरुद्ध निलंबनामुळे खेळू शकणार नाही. याशिवाय नोआ सदोई, महंमद यासीर, ओडेई ओनाइंडिया, रॉलिन बोर्जिस या प्रमुख खेळाडूंना आतापर्यंत तीन यलो कार्ड मिळाली आहेत, त्यामुळे त्यांच्यावरही संभाव्य निलंबनाची टांगती तलवार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
