Betoda Accident: बेतोडा जंक्शनवर दोन दुचाकींची समोरासमोर धडक, दोघांचा मृत्यू; रुग्णालयात नेण्याआधीच सोडला प्राण

फोंडा: बेतोडा येथील धोकादायक समजल्या जाणाऱ्या जंक्शनवर दोन दुचाकींमध्ये जोरदार धडक होऊन भीषण अपघात झाला. या अपघातात एका तरुण आणि तरुणीचा दुर्दैवी मृत्यू झाला. या घटनेने परिसरात खळबळ उडाली असून फोंडा उपजिल्हा रुग्णालयात अपघातग्रस्तांना पाहण्यासाठी मोठी गर्दी उसळली.

मिळालेल्या प्राथमिक माहितीनुसार, दोन्ही दुचाकींची समोरासमोर धडक झाली. धडकेचा जोर इतका जबरदस्त होता की, दोघांनीही रुग्णालयात नेण्याआधीच प्राण सोडले. आदित्य देसाई (बेतोडा) आणि ईशा गावस ( केरी) अशी अपघातात मृत्यू झालेल्या मृतकांची नावे आहेत. अदिती उमेश मांजरेकर (पर्ये, सत्तरी) ही दुसरी तरुणी जखमी असून योगेश परशुराम पाटील (22, म्हाळशी, कुर्टी) हा तरुण गंभीर जखमी आहे.

दरम्यान, घटनेची माहिती मिळताच फोंडा येथील नगरसेवक विश्वनाथ दळवी यांनी आपल्या कार्यकर्त्यांसह तातडीने फोंडा उपजिल्हा रुग्णालय गाठले आणि जखमींची आणि कुटुंबीयांची विचारपूस केली. रुग्णालयात (Hospital) या दरम्यान शिक्षक, विद्यार्थी आणि स्थानिक नागरिकांची मोठी गर्दी झाली होती. स्थानिक नागरिकांच्या मते, बेतोडा जंक्शनवर वाहतुकीसंदर्भात योग्य ती व्यवस्था नसल्यामुळे वारंवार अपघात घडत आहेत. या ठिकाणी ट्रॅफिक सिग्नल किंवा स्पीड ब्रेकरची नितांत गरज असून प्रशासनाने तात्काळ उपाययोजना कराव्यात, अशी मागणी आता जोर धरु लागली आहे.

पोलिस तपास सुरु

फोंडा पोलिसांनी अपघाताची (Accident) नोंद करून तपास सुरु केला आहे. सीसीटीव्ही फुटेज आणि प्रत्यक्षदर्शींच्या जबाबांवरुन अपघाताचे नेमके कारण शोधले जात आहे.