MLA Alex Sequeira: पर्यावरण व कायदामंत्री आलेक्स सिक्वेरा यांनी आज लोकांना भेटून त्यांच्या समस्या जाणून घेण्यासाठी दक्षिण गोवा जिल्हाधिकारी कचेरीतील सभागृहात खास बैठक बोलावली होती. या बैठकीत सासष्टीतील लोटली, कांसावली, कोलवा, नुवे या भागातील लोकांनी हजेरी लावून आपापल्या समस्या त्यांच्या कानावर घातल्या.
शॅकमालक असोसिएशनचे अध्यक्ष क्रुझ कार्दोज यांनी शॅकमधील सांडपाणी उचलण्यासाठी व्यवस्था करावी, अशी मंत्र्यांकडे मागणी केली. त्यावेळी हे काम एजन्सीकडे सोपविण्याचा सरकारचा विचार आहे.
एजन्सीचा प्रतिनिधी सर्व किनाऱ्यावरील शॅकचे सर्वेक्षण करेल व त्यानुसार आपला अहवाल सादर करणार आहे. त्यानंतरच अंतिम निर्णय घेणार आहे, असे मंत्र्यांनी सांगितले.
शॅक सुरू झाल्यास तीन महिने झाले. मात्र, आम्हाला नुकसानीत व्यवसाय करावा लागत आहे. अजून म्हणावे तितके पर्यटक येत नाहीत, अशी कैफियतही कार्दोज यांनी मांडली.
शॅकची सांडपाणी समस्या सोडविण्यासाठी आम्हाला तातडीच्या पर्यायाची गरज आहे. आम्ही एका एजन्सीकडे हे काम सोपविणार आहे. तो सर्वेक्षण करून प्रस्ताव सादर करील. आमची पुढील बैठक 20 डिसेंबरला होणार आहे. त्यात निर्णय घेतला जाईल, असेही मंत्र्यांनी सांगितले.
पे-पार्किंगचा निर्णय मुख्यमंत्री घेणार
पे पार्किंगबद्दल सिक्वेरा म्हणाले, की आपण याबद्दल मुख्यमंत्र्यांशी चर्चा केली असून ते या विषयावर योग्य तो निर्णय घेतील. लोकांच्या समस्यांची जाणीव मुख्यमंत्र्यांना आहे. पे पार्किंगची निविदा जाहीर केली आहे. कामाचा आदेश देण्यात आला आहे. त्यामुळे अंतिम निर्णय घेण्यास थोडा वेळ लागेल. आपल्या मते गोमंतकीय वाहनांना पे पार्किंगचे शुल्क लागू करू नये अशा मताचा आपण असल्याचेही मंत्री सिक्वेरा यांनी स्पष्ट केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
