Goa Assembly: वीजदर वाढले आता सुविधाही द्या; दिगंबर कामत यांनी सुनावले

पणजी: पाच वर्षांत विजेचा दर तीन पटीने वाढविला आहे. या दरवाढीचा परिणाम सर्वसामान्यांवर होतोय. दर वाढल्यानंतर वीजपुरवठा सुरळीत व्‍हावा किंवा त्यात सुलभता यावे अशी लोकांची अपेक्षा असते. वीजमंत्र्यांनी याकडे लक्ष द्यावे, अशी मागणी मडगावचे आमदार दिगंबर कामत यांनी केली.

वीज खात्याने विशेष अकाऊंट्‌स उघडावीत. हे आपण सतत सांगत आलो आहे. ग्रामीण भागात पाच लाखांवर ग्राहक आहेत. विजेचा दर वाढवला की त्यांच्यावर त्याचा परिणाम होतो. दर वाढवितात त्याप्रमाणे जनतेला सुविधाही मिळणे आवश्यक आहे, असे कामत म्‍हणाले.

पथदीपांची संख्या वाढली आहे. राज्यात सर्वत्र भूमिगत वीजवाहिन्‍यांचे काम सुरू आहे. केबलचा दर्जा आणि कामांकडे लक्ष दिले पाहिजे. भूमिगत वीजवाहिनीत बिघाड झाल्यास त्याच्या दुरुस्तीचे काम करण्‍यासाठी त्रयस्थ कंपनी नेमावी. मडगाव इनडोअर स्टेडियमवर उपकेंद्र झाल्यास नावेली, बाणावली गावांना त्याचा फायदा होईल, असेही कामत म्‍हणाले.

सरकारी वसाहतींवर उभारा सौरऊर्जा पॅनल

अनेक ठिकाणी वीजखांब खराब झालेले आहेत. ते तत्काळ हटवावेत. अक्षयऊर्जेसाठी लोकांना प्रोत्साहन दिले पाहिजे. सरकारी वसाहतींवर सौरऊर्जेचा पॅनल उभारावे, म्हणजे लोकांमध्ये जागृती होईल. त्यानंतर हॉटेल्‍स किंवा इतर इमारतींवर पॅनल बसवावेत. मग सवलत देऊन ग्रामीण लोकांना सौरऊर्जा पॅनल बसविण्यासाठी आवाहन करता येईल, अशी सूचना दिगंबर कामत यांनी केली.

सत्तरीत चार-चार दिवस नसतो विजेचा पत्ता; लोकांची गैरसोय

वीज कार्यालयात बसून राहणाऱ्या कनिष्ठ अभियंत्यांना कामाला लावले पाहिजे. भिरोंडा, सालेली येथे भूमिगत वीजवाहिनीचे काम अपूर्ण आहे, ते पूर्ण करावे. मुसळधार पावसामुळे सत्तरीतील वीज आणि पाणीपुरवठ्यावर परिणाम झाला आहे. चार-चार दिवस वीज नसते, असे पर्येच्‍या आमदार डॉ. दिव्‍या राणे यांनी सभागृहात सांगितले.

वीज खात्याच्या अधिकाऱ्यांमुळे सत्तरीत बऱ्याच ठिकाणची वीज समस्या सुटली आहे. पर्ये मतदारसंघात काही ठिकाणी भूमिगत वीजवाहिनीचे काम पूर्ण झालेले आहे. वाळपई उपकेंद्राअंतर्गत भूमिगत वीजवाहिनी टाकण्याचे काम केले आहे. अनेक गावे जंगलांत, डोंगरावर आहेत. तेथेही भू-वीजवाहिन्‍या टाकल्‍या आहेत, असे राणे म्‍हणाल्‍या.