वीजेचा खांब कोसळल्याने दुचाकीवरील तरुणी गंभीर जखमी

पणजी : धावत्या दुचाकीवर वीजेचा खांब कोसळल्याने पणजीत एक 16 वर्षीय विद्यार्थिनी गंभीर जखमी झाली आहे. तिच्यासोबत असलेल्या तिच्या नातेवाईकालाही इजा झाल्याची माहिती आहे. पणजीतील अल्तिन्हो परिसरात गुरुवारी दुपारी घडली आहे. अपघातात जखमी झालेल्या दोघांचीही प्रकृती गंभीर असल्याची माहिती आहे.

पणजीतील (Panjim) अल्तिन्होमध्ये वीज खात्याकडून वीजेच्या खांबावर दुरुस्तीचं काम सुरु होतं. मात्र यावेळी अचानक हा खांब कोसळून खाली आल्याने रस्त्याने दुचाकीवरुन जाणाऱ्या तरुणीवर पडला आणि या अपघातात (Accident) दुचाकीवरील दोघेही गंभीर जखमी झाले. दोघांनाही तातडीने रुग्णालयात हलवण्यात आलं असून त्यांची प्रकृती गंभीर असल्याची माहिती आहे. दोघांवरही उपचार सुरु असून सध्याची नेमकी स्थिती समजू शकलेली नाही.

दरम्यान मागच्याच महिन्यात ओल्ड गोवा (Old Goa) परिसरात माड कोसळून एका दुचाकीस्वाराचा मृत्यू झाला होता. आताही दुचाकीवर वीजेचा खांब कोसळल्याने पुन्हा एकदा रस्ते सुरक्षिततेचा प्रश्न ऐरणीवर आला आहे. या घटनेस कारणीभूत असलेल्या वीज कर्मचाऱ्यांच्या चौकशीची मागणीही केली जात आहे.