Mankurad Mango: आंब्यांच्या ‘राजा’ आला रे! माणकुराद, हापूस बाजारात विक्रीसाठी; काय आहेत दर? जाणून घ्या..

सासष्टी: गोव्यात आंब्यांचा हंगाम साधारणतः मार्च महिन्यात सुरू होतो. मात्र, यंदा मडगावात आंब्यांच्या ‘राजा’ म्हणून ओळखल्या जाणाऱ्या मानकुराद आंब्यांची गुरुवारीच विक्री सुरू झाल्याने आंब्यांच्या मोसमाची चाहूल लागली आहे. झाडांना नुकताच मोहर फुटत असतानाच बाजारात आंबे दिसू लागल्याने ग्राहकांमध्ये उत्सुकता वाढली आहे.

गोमंत विद्या निकेतन समोरील आबाद फारिया रस्त्याच्या बाजूला दरवर्षी आंबे विकणाऱ्या एका व्यापाऱ्याकडे हे मानकुराद आंबे विक्रीसाठी ठेवण्यात आले होते. सुरुवातीच्या टप्प्यात उपलब्ध असलेल्या मानकुराद आंब्यांचा दर प्रत्येकी सुमारे ६०० रुपये इतका ठेवण्यात आला होता.

तसेच, हापूस आंबेही बाजारात दाखल झाले असून त्यांची विक्री सुमारे १५०० रुपये डझन दराने करण्यात येत आहे. हंगामाच्या सुरुवातीला आंब्यांची आवक कमी असल्याने दर अधिक असतात, अशी माहिती व्यापाऱ्यांनी दिली.

पुढील काही आठवड्यांत मोठ्या प्रमाणात आंबे बाजारात येण्याची शक्यता असून त्यानंतर दरात घट होण्याची अपेक्षा व्यक्त करण्यात येत आहे. आंब्यांच्या लवकर आगमनामुळे ग्राहकांमध्ये आनंदाचे वातावरण असून, आंबा प्रेमी हंगामाची आतुरतेने वाट पाहत आहेत.