Bardez: बार्देशवासियांना दिलासा मिळणार का? पाणीपुरवठा सुरळीत होण्याबाबत अभियंता काय म्हणाले?

अस्नोडा जलशुद्धीकरण प्रकल्पातील वीज ट्रान्सफॉर्मरमध्ये तांत्रिक बिघाड निर्माण झाल्याने गेले दोन-तीन दिवस बार्देश तालुक्‍यातील काही ठिकाणी पाणीपुरवठ्यावर परिणाम झाला. उद्या मंगळवारपर्यंत पाणीपुरवठा पूर्ववत होईल, असे अभियंत्यांनी सांगितले.

उपलब्ध माहितीनुसार, अस्नोडा जलशुद्धीकरण प्रकल्पातील ३० एमएलडी पाणी प्लांटला जोडणाऱ्या वीज ट्रान्सफॉर्मरमध्ये बिघाड झाल्याने मागील दोन दिवस बार्देश तालुका तसेच डिचोली तालुक्यातील काही भागात काल रविवारपर्यंत (ता. १४) मर्यादित पाणीपुरवठा होता. सार्वजनिक बांधकाम खात्‍याने तशी सार्वजनिक नोटीस काढली होती.

चिंचोळे, भाटलेत दूषित पाणीपुरवठा

राजधानी पणजीतील चिंचोळे-भाटले भागात दूषित पाणीपुरवठा होत असल्‍याने या परिसरातील नागरिकांमध्ये आरोग्याच्या समस्या निर्माण होण्याची शक्यता आहे. राज्याच्‍या अनेक भागांमध्ये ब्‍लिचिंगयुक्त पाणी पुरविले जात असल्याच्या तक्रारीही वाढत आहेत. चिंचोळे, भाटलेत लालभडक पाणी येते. त्यामुळे प्रशासनाने योग्य ती काळजी घेणे गरजेचे बनले आहे.