कदंब महामंडळाच्या शटल बसेसच्या कमतरतेमुळे मडगाव-पणजी मार्गावर प्रवास करणाऱ्या प्रवाशांचे हाल झाले आहेत. महामंडळाचे अध्यक्ष तथा आमदार उल्हास तुयेकर यांनी महामंडळाला 100 बसेसचा तुटवडा भासत असल्याची माहिती दिली असली तरी या बसेसची सेवा अजून सुरू झाली नसल्याने मडगाव बसस्थानकावर दररोज प्रवाशांच्या रांगा लागत आहेत.
राज्यअंतर्गत प्रमुख मार्गावर प्रवाशांना जलद सेवा देण्यासाठी शटल बससेवा आहे. दक्षिण गोव्यातील अनेक सरकारी व बिगरसरकारी कर्मचारी आपल्या कामाच्या ठिकाणी वेळेवर पोहोचण्यासाठी मडगाव बसस्थानकावर येतात. मात्र, त्यांना कदंबच्या शटल बसेस उपलब्ध नसल्याने नाहक मनस्ताप सहन करावा लागत आहे.
बस वेळेवर नाही
दररोज शटल बसने प्रवास करणाऱ्या एका प्रवाशाने सांगितले की, मागील एक महिन्यापासून कधीच बस वेळेवर मिळत नाही. त्यामुळे ऑफिसला पोहोचायलाही उशीर होत आहे. कामावर वेळेवर न पोहोचल्याने वरिष्ठांची बोलणी खावी लागतात. हे किती दिवस चालणार याची शाश्‍वती नाही.
"काणकोणवरून पर्वरी येथे कामाला येण्यासाठी सकाळी ७ वाजता निवासस्थानाहून निघते. ८ ते ८.२५ वा.दरम्यान मडगावला पोहोचते. त्यावेळी शटल बसने प्रवास करण्यासाठी मडगाव ते पणजी मार्गावर प्रवाशांच्या रांगा लागलेल्या असतात. त्यामुळे माझा क्रमांक येईपर्यंत ३० ते ४० मिनिटे वाया जातात."
- दीपा गावकर, काणकोण
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
