तोंडात गावठी बॉम्बचा स्फोट झाल्याने एक पाळीव कुत्रा तडफडून मृत्युमुखी पडला. ही धक्कादायक घटना लाटंबार्से पंचायत क्षेत्रातील कासारपाल येथील एका वाड्याजवळ घडली. भर लोकवस्तीजवळ घडलेल्या या जीवघेण्या घटनेमुळे स्थानिकांमध्ये भीतीचे वातावरण आहे.
मिळालेल्या माहितीनुसार, रानडुकराची शिकार करण्यासाठी पेरलेला गावठी बॉम्ब कुत्र्याने तोंडात घेतल्याने ही घटना घडल्याचा संशय आहे. या प्रकारामुळे कासारपाल भागात गावठी बॉम्बचा वापर करून रानडुकरांची शिकार करण्यात येत असल्याचे स्पष्ट झाले असून, स्थानिकांमध्ये खळबळ माजली आहे.
पोलिसांनी याप्रकाराची दखल घेत मोठा अनर्थ घडण्यापूर्वी गावठी बॉम्ब पेरणाऱ्यांविरोधात कडक कारवाई करावी, अशी मागणी स्थानिकांकडून करण्यात आली आहे.दरम्यान, याप्रकरणी कासारपाल येथील योगीता दशरथ तारी या महिलेने डिचोली पोलिसांत तक्रार दाखल केली आहे.
गावठी बॉम्बमुळे ‘सॅण्डी’ नामक पाळीव कुत्रा मृत्युमुखी पडल्याचे त्यांनी तक्रारीत म्हटले आहे. पुढील पोलिस तपास सुरू आहे.
लहान मुले सुदैवाने वाचली
सोमवारी सायंकाळी कासारपाल येथील लोकवस्तीजवळ कानठळ्या बसविणारा स्फोट झाला. घाबरलेल्या लोकांनी आवाजाच्या दिशेने धाव घेतली. त्यावेळी एक पाळीव कुत्रा मृत्युमुखी पडल्याचे आढळून आले.
कुत्र्याचा जबडा फुटला होता. ज्याठिकाणी गावठी बॉम्बचा स्फोट झाला, त्या परिसरात लहान मुले खेळत होती. सुदैवाने त्या ठिकाणी स्फोट न झाल्याने मोठा अनर्थ टळला. या घटनेमुळे स्थानिकांमध्ये खळबळ माजली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
