Festive spirit fills the air as Diwali shopping gains momentum In Goa
डिचोली: बालगोपाळांसह सर्वांचा आनंद द्विगुणित करणारी दिवाळी तोंडावर आल्याने सध्या डिचोलीत सर्वत्र या सणाची लगबग सुरू झाली आहे. दिवाळीच्या साहित्याने बाजारपेठही फुलू लागली असून गावठी पोह्यांसह गोड-तिखट पोहे, चकली, शंकरपाळी, लाडू, चिवडा आदी दिवाळीचा फराळही बाजारात दाखल होत आहे.
महिला स्वयंसाहाय्य गटांनी तयार केलेला फराळही बाजारात विक्रीस उपलब्ध आहे. मिठाईची दुकानेही विविध प्रकारच्या मिठाईने सजू लागली आहेत. पुढील दोन दिवसात सर्व प्रकारची मिठाई बाजारात दाखल होणार आहे. दिवाळीच्या साहित्य खरेदीला अजून म्हणावा, तसा जोर आलेला नाही. मात्र पुढील दोन दिवसात दिवाळीचा बाजार फुलणार आहे.
एक काळ असा होता, की बहुतेक भागात गावठी भातापासून पोहे कांडण्यात येत होते. हा प्रकार कालबाह्य झाला असला, तरी अजूनही दिवाळीला गावठी पोह्यांना मागणी आहे. बाजारी पोह्यांसह गावठी पोहे डिचोलीच्या बाजारात विक्रीस उपलब्ध झाले आहेत. १०० रुपये किलो असे गावठी पोहे, तर फुलविलेले पोहे १२० रुपये किलो. असे पोह्यांचे दर आहेत. बाजारातील बहुतेक सर्व भुसारी (किराणा) दुकानात गावठी पोहे उपलब्ध आहेत.
दिवाळी म्हणजे दिव्यांचा सण. घरोघरी आकाशकंदील आणि पणत्या पेटवून दिवाळीचे स्वागत करण्यात येते. मातीकाम करणाऱ्या बहुतेक कलाकारांनी पणती व्यवसायाकडे दुर्लक्ष केल्याने गेल्या काही वर्षांपासून डिचोलीच्या बाजारपेठेत राज्याबाहेरील पणत्यांची चलती झाली आहे. सध्या डिचोलीच्या बाजारात दोडामार्ग जवळील ''आयी''सह कर्नाटकातील खानापूर येथील पणत्या विक्रीस येवू लागल्या आहेत. शहरातील काही पारंपरिक कलाकार आकाशकंदील सजवून ते बाजारात विक्रीस उपलब्ध करतात. आकाशकंदील सजविण्याच्या कामात सध्या कलाकार व्यस्त असून, हे काम अंतिम टप्प्यात आले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.