बेतूलात दोन गटांत वाद; दर्ग्याला टाळे

केपे: बेतूल येथील दर्ग्याचा उरूस साजरा करण्यावरून दोन गटात तणाव उद्‍भवल्याने यावर तोडगा काढण्यासाठी दि. 31 रोजी केपे उपजिल्हाधिकारी नीलेश धायगोडकर यांनी बैठक बोलावली आहे. तोपर्यंत दर्ग्याला टाळे ठोकण्यात आले आहे.

रमजान ईद झाल्यानंतर दहा दिवसांनी येथे संदल हा कार्यक्रम करण्यात येतो व दुसऱ्या दिवशी उरूस साजरा करण्यात येतो, पण ( रात्री दि.12 रोजी ) संदल साजरा करण्याच्या दिवशी एका गटाने दिलेल्या वेळेच्या आधीच हा कार्यक्रम करून दर्ग्याला टाळे ठोकल्याने दुसऱ्या गटाला हा कार्यक्रम साजरा करण्यास आडकाठी आणल्याने बेतुल येथे दोन्ही गटामध्ये तणावाचे वातावरण निर्माण झाले होते यावेळी केपेचे उपजिल्हाधिकारी नीलेश धायगोडकर व मामलेदार प्रताप देसाई यांनी बेतुल येथे जाऊन परिस्थिती नियंत्रणात आणली होती व याविषयी आज दि.13 रोजी केपे उपजिल्हाधिकारी कार्यालयात दोन्ही गटांची बैठक बोलावण्यात आली होती, पण यावेळी एका गटाचे सदस्य न आल्याने सदर बैठक आता दि. 31 मे रोजी ठेवली आली आहे, असे धायगोडकर यांनी सांगितले.

दरम्यान, उपजिल्हाधिकाऱ्यांच्या आदेशानुसार दर्ग्याला टाळे लावले असून आता तसाच उरूस साजरा करण्यात येणार असल्याचे शेख यांनी सांगितले. एकोपा बिघडवण्याचे काम दुसरा गट करीत असल्याचे शेख यांनी सांगितले.

‘संदल’ वेळेआधीच उरकल्याने वाद

बेतुल येथील शेख जाहिद यांनी सांगितले,की दर्ग्याविषयी दोन गटातील सुनावणी सध्या न्यायालयात सुरू आहे. दर वर्षी संदल हा कार्यक्रम रात्री 10 वाजता करण्यात येतो. पण यावर्षी दुसऱ्या गटाने हा कार्यक्रम 9 वा. उरकून दर्ग्याला कुलूप ठोकल्याने वाद निर्माण झाला. बेतूल गावातील मुस्लिम बांधवांना हा कार्यक्रम करण्यापासून रोखण्यात आले.