कुठे आहे,‘नशा मुक्त गोवा’; दिगंबर कामत यांचा सवाल

पणजी: राज्यपालांनी आपल्या अभिभाषणात ‘नशा मुक्त गोवा’ असा उल्लेख केला. तोच धागा पकडून विरोधकांनी राज्यात ड्रग्ज व्यवहाराचे जाळे विणल्याचे मागील छाप्यांतून दिसत असल्याचे नमूद केले. विरोधी आमदार दिगंबर कामत, युरी आलेमाव, मायकल लोबो आणि विजय सरदेसाई यांनी कुठे आहे,नशामुक्त गोवा असा सवाल करून राज्यपालांच्या वक्तव्यावर उपहास व्यक्त केला.

(Digambar Kamat criticized the government)

राज्यपालांच्या अभिभाषणावर मत व्यक्त करताना सुरुवातीला युरी आलेमाव यांनी दाबोळी विमानतळाविषयी राज्य सरकारने श्‍वेतपत्रिका काढावी, अशी मागणी केली. त्यांनी राज्य सरकारने राबविलेल्या सरकार तुमच्या दारी, स्वयंपूर्ण गोवा योजनांचा व नशामुक्त गोवा अशा केलेल्या उल्लेखावर मत व्यक्त केले. त्यांनी राज्यात अंमली पदार्थाचे जाळे विस्तारले आहे. अंमलीपदार्थ विक्री व्यवहाराच्या घटनांनी उच्चांक गाठला आहे, ते मागील छाप्यांवरून दिसून येते. त्यामुळे खरोखरच सुरक्षित गोवा उरला आहे का? असा सवालही त्यांनी केला. आमदार विजय सरदेसाई यांनीही ‘नशा मुक्त गोवा’वरून सरकारला आरसा दाखविण्याचा प्रयत्न केला.

आमदार कामत यांनी 2021 मध्ये राज्यपालांनी नशा मुक्त गोवा करण्याचे जाहीर केले होते, याचे स्मरण त्यांनी सभागृहात करून दिले. तोच उपक्रम आताही राबविला जात असल्याचे सांंगितले. मात्र सध्या अंमलीपदार्थ शालेय विद्यार्थ्यांपर्यंतही पोहचला आहे, शितपेयातूनही अंमलीपदार्थ दिला जाऊ शकतो, असेही त्यांनी सूचित केले.

आमदार मायकल लोबो यांनीही अमली पदार्थ विक्री व्यवहार थांबविण्यासाठी विशेष पथक नेमण्याची गरज त्यांनी व्यक्त केली. त्याशिवाय म्हापशात एक अल्पवयीन मुलाला ताब्यात घेतले होते. परंतु त्याला सोडून दिले आहे, हे त्यांनी नमूद केले. पोलिस अमलीपदार्थ विक्री करणाऱ्यांना सोडून देतात आणि खरेदी करणाऱ्यांना पकडतात, हेही त्यांनी सभागृहाच्या लक्षात आणून दिले.

अंमलीपदार्थ विद्यार्थ्यांपर्यंत : आमदार दिगंबर कामत म्हणाले की, अंमली पदार्थ यापूर्वी महाविद्यालयीन विद्यार्थ्यांपर्यंत पोहोचल्याचे दिसत होते. पण आता हा व्यवहार शालेय विद्यार्थ्यांपर्यंतही ते पोहोचला आहे, असे मागील घटनांतून दिसून आले आहे. एखादे शितपेय मागविल्यास त्या शितपेयाची बाटलीही समोरच उघडण्यास सांगायला हवे,अन्यथा काहीही शितपेयात कुणीही टाकू शकतो.