Devdarshan Yatra: देवदर्शन योजना होणार एप्रिलपासून पूर्ववत- फळदेसाई

Devdarshan Yatra मुख्यमंत्री देवदर्शन योजनेसाठी ठेवण्यात आलेला निधी खर्च झाल्याने ही योजना तूर्त स्थगित ठेवण्यात आली आहे. आगामी अर्थसंकल्पात योजनेसाठी निधीची तरतूद केल्यानंतर एप्रिलपासून पुन्हा ती सुरू होईल, अशी माहिती समाजकल्याणमंत्री सुभाष फळदेसाई यांनी दिली.

‘या योजनेसाठी सुमारे 12 हजारांहून अधिक अर्ज आले असून त्याची छाननी सुरू आहे. या मोफत योजनेचा लाभ एकदाच घेता येतो, अशी अट असूनही काहींनी दुसऱ्यांदा अर्ज केलेत’, असे मंत्री फळदेसाई म्हणाले.

विशेष नागरिकांसोबत सहायकाला जाण्याची सूट असल्याने त्याचा अनेक विकलांग नागरिकांनीही लाभ घेतला आहे, अशी माहिती खात्याच्या अधिकाऱ्यांनी दिली. योजना अगोदर ज्येष्ठ नागरिकांसाठी होती.

मात्र, 50 वर्षांवरील नागरिकांना त्याचा लाभ घेता येत आहे. लाभ घेतलेल्यांनी दुबार अर्ज केल्याने ते बाद ठरविले जात असून त्यामुळे छाननीसाठी वेळ लागत आहे. सरकारची ही लोकप्रिय योजना असून ती सुरू व्हावी अशी समस्त जनतेची अपेक्षा होती, ती पूर्ण होणार आहे.