Pernem: पोर्तुगीज काळातील शिपायांचे वसतीस्थान पाडण्याच्या कामास प्रारंभ, 7 महिन्यांपूर्वी कोसळला होता भाग

पेडणे: पेडणे बाजारपेठेतील सात महिन्यांपूर्वी एक भाग कोसळलेली पोर्तुगीजकालीन इमारत पेडणे नगरपालिकेच्या आदेशानुसार पाडण्याचे काम सुरू झाले आहे.

पेडणेहून म्हापसा-पणजीच्या दिशेने जाणाऱ्या मुख्य रस्त्याजवळ ही एकमजली इमारत असल्याने सावधगिरीचा उपाय म्हणून या बाजूने वाहतूक बंद केली असून ती अन्य मार्गाने वळविण्यात आली आहे. ही इमारत पोर्तुगीजकालीन असून पोर्तुगीज काळात या इमारतीच्या अर्ध्या भागात पोर्तुगीज शिपाई (पाखले) राहात होते. गोवा स्वातंत्र्यानंतर आजपर्यंत या इमारतीत एक कुटुंब तसेच एक औषधालय व दोन दुकाने होती.

११ ऑक्टोबर २०२४ रोजी दुपारी १.३० वाजण्याच्या सुमारास या इमारतीचा एका बाजूचा मोठा भाग कोसळून पडला होता.

या इमारतीच्या जवळून म्हापसा-पणजीला जाणारी एकेरी वाहतूक सुरू असते. इमारत कोसळण्यापूर्वी या इमारतीचे काही छोटे अवशेष पडायला सुरुवात झाल्यावर जागरूक नागरिकांनी या जवळच्या मार्गावरून जाणाऱ्या वाहनांना रोखले व त्याची पेडणे पोलिसांना माहिती दिल्यावर बॅरिकेड्‌स घालून हा रस्ता बंद करण्यात आला होता.

कोसळलेल्या इमारतीच्या याच भागात एक कुटुंब राहत होते; पण तीन-चार वर्षांपूर्वी हे कुटुंब अन्यत्र बांधलेल्या आपल्या घरात राहण्यासाठी गेले होते. तर पेडणे नगरपालिकेने नोटीस काढून तेथील दुकानदारांना त्यांचे दुकानातील सहित्य काढण्यास सांगून दुकानांना सील ठोकले होते.

दोन दिवसांत काम पूर्ण

एक आठवड्यापूर्वी ही धोकादायक इमारत पाडण्यासाठी या इमारतीवरील कौले काढण्यात आली; पण त्यानंतर अवकाळी पाऊस सुरू झाल्यामुळे पेडणे पालिकेने त्वरित कारवाई करून जोरदार पाऊस असतानाही जेसीबी यंत्र व मजुरांच्या मदतीने इमारत पाडण्याचे काम सुरू केले. येत्या दोन दिवसात संपूर्ण इमारत पाडून तिचे सपाटीकरण करण्यात येणार आहे.