Goa News: नारळ फेणी, गूळ, विनेगरला ‘जीआय टॅग’ देण्याची सरकारकडे मागणी करणार

Goa News: नारळाची फेणी, नारळापासून तयार केलेला गूळ व विनेगरला जीआय टॅग मिळवून देण्याची मागणी सरकारकडे करणार आहोत, असे अखिल गोवा टॉडी टॅपर्स असोसिएशनचे अध्यक्ष फ्रांसिस फर्नांडिस यांनी सांगितले. असोसिएशनच्या मासिक बैठकीनंतर ते पत्रकारांशी बोलत होते.

याबाबत यापूर्वीही आम्ही सरकारकडे मागणी केली होती. या मागणीवर आम्ही पुन्हा जोर देणार आहोत. गोव्याच्या नारळ फेणीला 400 वर्षांचा इतिहास आहे. नारळाचा माडाला राज्य वृक्ष म्हणून मान्यताही आहे.

त्यामुळे या उत्पादनाला जीआय टॅग देणे हे सरकारचे कर्तव्य असल्याचे फर्नांडिस यांनी सांगितले. तसेच सरकारी नोकरीत व शिक्षणातही आम्हाला आरक्षण दिले पाहिजे अशी मागणी फर्नांडिस यांनी केली.

आपण कुंभार, मच्छीमार यासारख्या समाजाच्या नेत्यांशी चर्चा करून त्यांच्या संघटना कशा कार्य करतात त्याची माहिती मिळविणार असल्याचेही फर्नांडिस यांनी सांगितले.

आमची संघटना अस्तित्वात आहे, संघटनेची कचेरी व्यवस्थित चालत आहे व समाजासाठी पूर्णपणे कार्यरत आहे हे पण आम्हाला दाखवून द्यायचे आहे, असेही फर्नांडिस म्हणाले.