'सोपो कंत्राटदाराकडून थकबाकीची रक्कम त्वरित वसूल करा'

मडगाव : मडगाव पालिकेने सोपो कंत्राटदाराला जी सोप्याच्या वसुलीत सूट देण्याचा ठराव घेतला होता, त्याला नगर पालिका प्रशासन संचालक कार्यालयाने हरकत घेतल्याच्या पार्श्वभूमीवर त्या कंत्रादाराकडून थकबाकीची रक्कम त्वरित वसूल करा अशी मागणी शेडॉ कौन्सिलचे सावियो कुतीन्हो यांनी केली आहे.

कोविडच्या काळात सोप्याची वसुली कंत्राटदाराला योग्य प्रकारे करता आली नाही असे नमूद करून या कंत्राटदाराला 32 लाख रुपयांची सूट देण्याचा निर्णय मडगाव पालिकेने घेतला होता. या निर्णयाला शेडॉ कौन्सिलने हरकत घेत पालिका संचालकाकडे तक्रार केली होती. यावर पालिका संचालक कार्यालयाने मंडळ कंत्राटदाराला अशी सूट देऊ शकत नाही असे सुनावले आहे.

एक तर पालिकेने ही सुटीची रक्कम 15 दिवसात वसूल करावी किंवा या ठरावाला पाठिंबा देणाऱ्या 16 नगरसेवकांनी आपले पदरचे प्रत्येकी 2 लाख रुपये अनामत रक्कम म्हणून पालिकेत जमा करावे अशी कुतीन्हो यांनी मागणी केली आहे. अन्यथा न्यायालयासह योग्य कार्यकरिणीकडे दाद मागण्यास शेडॉ कौन्सिल तयार आहे असे त्यांनी प्रसिद्धीस दिलेल्या पत्रकात म्हटले आहे.

कोविड च्या काळात सगळे व्यवसाय मंदित चालतात हे माहीत असूनही त्या कंत्रातदाराने बोली लावली होती. त्यामुळे बाजारात किती व्यवसाय चालू आहे त्याची त्याला माहिती होती असे होते. असे असताना पहिल्याच महिन्यात त्याला सूट कशी दिली गेली असा सवाल करीत कोविडच्या काळात मडगावच्या व्यापाऱ्यांना करात 50 टक्के सूट द्या अशी पालिकेकडे मागणी केली होती ती फेटाळून लावली होती. अशा परिस्थितीत या कंत्राटदाराला सूट दिली जाते ती तो पालिकेचा घरजावई म्हणून का असा सवाल त्यांनी केला आहे.