Street Vendors: फोंड्यात रस्त्यावरील विक्रेत्यांंवर कारवाई करण्याची मागणी

Street Vendors: राज्यातील रस्त्यांवर फळ व फुलांचा व्यापार घेऊन बसणाऱ्या परप्रांतीयांना आळा घालावा, अशी मागणी रिव्होल्युशनरी गोवन्सच्या कार्यकर्त्यांनी केली आहे.

विशेषतः फोंडा पालिका क्षेत्रातील रस्त्यांवर ऐन सणासुदीला परराज्यातून आलेले विक्रेते फुले व फळे विकत असल्याने गोमंतकीय व्यावसायिकांचा धंदा मंदावण्याचा प्रकार घडत आहे.

फोंडा पालिकेला व फोंडा पोलिस स्थानकावर यासंबंधी ‘आरजी’चे कार्यकर्ते तसेच फोंड्यातील व्यापाऱ्यांनी एक निवेदन दिले असून रस्त्यावर बसून माल विक्री करणाऱ्या परप्रांतीय विक्रेत्यांवर त्वरित कारवाई करण्याची मागणी केली आहे.

राज्यात विविध ठिकाणी रस्त्यांवर अशाप्रकारे फुले, फळे तसेच इतर साहित्य विकण्याचे प्रकार होत असल्याने अपघात होत आहेत. शिवाय गोमंतकीय विक्रेत्यांना ग्राहक मिळत नसल्याने त्यांच्या रोजीरोटीचा प्रश्‍न निर्माण होत आहे.