मडगाव: दिल्लीतून गोव्‍यात बीफची तस्करी केली जात असल्‍याचे आज पुन्‍हा एकदा उघड झाले. चिकनच्‍या नावाखाली १५ पेट्यांचे पार्सल दिल्‍लीहून पाठविले होते. आज मडगाव रेल्वेस्थानकावर ते उतरवल्‍यावर या १५ पैकी १० पेट्या (७० किलो) बीफच्‍या असल्‍याचे दिसून आले. त्‍यामुळे दिल्लीतून होणारी बीफची तस्करी अजुनही थांबलेली नाही हे उघड झाले आहे.
‘केसरिया हिंदू वाहिनी गोरक्षक प्रकोष्ठ’च्या राजीव झा यांनी आज हा प्रक़ार उघडकीस आणला. हे पार्सल नेण्यासाठी आलेल्या एका संशयिताला कोकण रेल्वे पोलिसांच्या ताब्यात दिले आहे.
मडगाव रेल्वेस्थानकावरील फलाट क्रमांक सहावर रेल्वेतून आलेल्या पार्सलमधून दुर्गंधी येत असल्याची माहिती झा यांना मिळाल्‍यावर त्यांनी घटनास्थळी धाव घेत कोकण रेल्वे पोलिसांना माहिती देत पार्सल खुले केले असता त्यात इतर मांसासोबत बेकायदेशीररीत्या वाहतूक करण्यात आलेले बीफही आढळून आले. शिवाय सदर पार्सल नेण्यासाठी आलेल्या पणजी येथील अख्तर बेपारी याला हिंदू संघटनांच्या कार्यकर्त्यांनी पकडून पोलिसांच्या ताब्यात दिले.
बॉक्समध्ये चिकन व मटनसोबत बीफही पाठवण्यात आले होते. ७० किलोची १५ पार्सल दिल्ली येथून पाठवण्यात आली होती. दोन दिवसांच्या प्रवासानंतर त्यातून पाणी वाहून वासही येत होता. कोकण रेल्‍वेचे पोलिस निरीक्षक सुनील गुडलर यांना झालेली अटकही याच तस्‍करीशी संबंधित असल्‍याचा दावा झा यांनी केला. गुडलर यांनी यापूर्वी बेकायदा बीफवर कारवाई केली होती. कारवाई टाळण्‍यासाठीच बीफ माफियांकडून त्यांना फसवण्यासाठी डाव रचण्यात आल्याचा आरोप झा यांनी केला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
