Panjim Municipal Council: मासळी बाजाराचा पुनर्विकास निर्णय; रस्त्यांवरून खडाजंगी
पणजी, ता. ६ (प्रतिनिधी) : येथील मासळी बाजाराचा पुनर्विकास करण्याचा महत्त्वाचा निर्णय महानगरपालिकेच्या बैठकीत घेण्यात आला. राजधानीतील रस्त्यांच्या दुरावस्थेवरून नगरसेवकांत खडाजंगी झाली. तसेच अनेक महत्त्वाच्या समस्या महापालिकेच्या बैठकीत नगरसेवकांनी लक्षात आणून दिल्या. या सर्व समस्या सोडविण्याचे आश्वासन महापौर रोहित मोन्सेरात यांनी यावेळी दिले.
पाऊस पडल्यानंतर नेवगीनगर क्षेत्रात पाणी भरण्यास आणि २२ तास ते पाणी तसेच राहण्यास जलसंपदा विभाग आणि विभागात काम करणारे अभियंते जबाबदार असल्याचा आरोप नगरसेवक शुभम चोडणकर यांनी केला.
चोडणकर यांनी यावर भाष्य करताना स्पष्ट केले की, मी स्वतः जलसंपदा विभागाला याची माहिती देऊन भविष्यात उद्भवणारी ही समस्या सोडविण्याची विनंती केली होती. मात्र, विभागातील अधिकारी फक्त अहंकार दाखवतात. याचा त्रास सर्वांना सहन करावा लागत असल्याने महापौराने मंत्र्यांना भेटावे आणि हा प्रश्न निकाली लावावा, असे आवाहनही त्यांनी केले.
नगरसेवक माखिजा पिंटो यांनी लोकोत्सव आणि इतर महोत्सवांमुळे लोकांना होणाऱ्या त्रासांवर भाष्य केले. सरकार मोठे महोत्सव करतात. मात्र, त्याचा काहीच फायदा महानगरपालिकेला होत नाही. स्मार्ट सिटीमुळे रस्ते बंद असल्याने वाहतुकीस मार्ग मोकळे नव्हते आणि पार्किंग सोयदेखील नियोजित केलेली नव्हती.
स्थानिकांच्या घरासमोर पार्किंग केले. रुग्णवाहिकादेखील २५ मिनिटे या वाहतूक कोंडीत अडकली. याचा त्रास लोकांना होत असल्याने संबंधित विभागाला स्थळ बदलण्याची मागणी करावी, अशी सूचनादेखील पिंटो यांनी केली.
नगरसेवकाला मारल्याचा निषेध
नगरसेवक उदय मडकईकर यांनी नगरसेवकाला मारहाण केल्याच्या घटनेचा निषेध केला. त्यांनी सांगितले की, ज्यांना पावती देऊन निधी गोळा करण्याचा अधिकार नाही ते नगरसेवक तेथे का जातात, हा प्रश्न प्रथम उद्भवतो. हा निधी गोळा करताना नगरसेवकाने निरीक्षकाला सोबत नेणे महत्त्वाचे आहे.
कंत्राटदाराविरोधात न्यायालयात जाणार
स्मार्ट सिटीचे काम खालच्या दर्जाचे झाल्याने मी स्वतः न्यायालयात याचिका दाखल करणार असल्याचे उदय मडकईकर यांनी सांगितले. माहिती हक्क कायद्यांतर्गत मी माहिती मागितल्याने त्यासाठी काही महिने लागणार आहेत. ती माहिती मिळाल्यावर लगेच न्यायालयात मी याचिका दाखल करून कंत्राटदाराला ब्लॅकलिस्ट करण्याची मागणी करणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.