Rohan Khaunte: कळंगुटमध्ये अवैध धंदे सुरूच... खुद्द पर्यटन मंत्र्यांनीच केले मान्य

Rohan Khaunte: गोव्यातील किनारी भागात अवैध धंदे सुरू असल्याचे आता खुद्द राज्याचे पर्यटन मंत्री रोहन खंवटे यांनीच मान्य केले आहे. कळंगुट येथे मोठ्या प्रमाणात अवैध धंदे सुरू आहेत. येथे अवैध वेश्याव्यवसायदेखील सुरू आहे. या प्रकरणी स्थानिक पोलिसांना जाब विचारला पाहिजे, असे खंवटे यांनी म्हटले आहे.

काही दिवसांपुर्वीच कळंगुटचे आमदार मायकल लोबो यांनी कळंगुट परिसरातील रेस्टॉरंट, हॉटेलमध्ये खंडणी मागितली जात असल्याचे म्हटले होते. खुद्द त्यांच्याच हॉटेलमध्ये खंडणी मागितली गेल्यावर त्यांनी याविषयी आवाज उठवला होता. दरम्यान, त्यानंतर त्यांनी खंडणी प्रकरण आता मिटले आहे, असेही म्हटले होते.

शिवाय कळंगुट-बागा या किनारी भागात इतरही अवैध धंदे मोठ्या प्रमाणात सुरू असल्याच्या तक्रारी सातत्याने समोर येत होत्या. त्या पार्श्वभुमीवर आता खुद्द पर्यटन मंत्र्यांनीच याला दुजोरा दिला आहे.

कळंगुट भागात मोठ्या प्रमाणात अवैध धंदे सुरू आहेत, याबद्दल तेथील स्थानिक पोलिस निरीक्षकांना जाब विचारला पाहिजे, असे मंत्री खंवटे यांनी म्हटले आहे.

दरम्यान, मंत्री खंवटे हे भाजपचे आमदार आहेत. सध्या राज्यात भाजपचे सरकार आहे. तसेच कळंगुटचे आमदार मायकल लोबोदेखील भाजपचे आहेत. त्यामुळे भाजपच्या मंत्र्यांनीच भाजप आमदारच्या मतदारसंघातील गैरप्रकारांबाबत दुजोरा दिल्याने राजकीय वर्तुळात त्याची चर्चा होत आहे.