Danielle McLaughlin Murder Case: डॅनियली मॅकलॉलीन हत्‍या प्रकरणी विकट भगतकडून जन्‍मठेपेच्या शिक्षेला खंडपीठात आव्हान

पणजी: राजबाग-काणकोण येथे आठ वर्षांपूर्वी ब्रिटिश युवती डॅनियली मॅकलॉलीन हिच्‍या खूनप्रकरणी आरोपी विकट भगत याला दक्षिण गोवा सत्र न्‍यायालयाने १७ फेब्रुवारीला जन्‍मठेपेची शिक्षा सुनावली होती. त्‍यानंतर विकट याने ‘त्‍या’ शिक्षेला मुंबई उच्च न्यायालयाच्या गोवा खंडपीठात आव्हान दिले आहे.

डॅनियली हिचा मार्च २०१७ मध्‍ये राजबाग-काणकोण समुद्रकिनाऱ्यावर खून झाला होता. या प्रकरणात काणकोण पोलिसांनी विकट भगत याला अटक केली होती. खून करण्‍यापूर्वी तिच्‍यावर लैंगिक अत्‍याचार करण्‍यात आल्‍याचे शवचिकित्‍सा अहवालातून उघड झाले होते.

तपासी अधिकाऱ्यांनी भक्‍कम साक्षी-पुरावे तयार केल्‍याने विकटला शिक्षा झाली. दरम्‍यान, शिक्षेविरोधात विकटने खंडपीठात धाव घेतली आहे. ही याचिका लवकरच खंडपीठासमोर येईल.

विकट भगत आणि डॅनियली यांच्यात मैत्री होती. दरम्यान, होळीच्या उत्सवानंतर विकटने डिनियलीवर जबरदस्ती करण्याचा प्रयत्न केला. विरोधानंतर देखील विकटने तिच्यावर लैंगिक अत्याचार केला. व नंतर खून केला. राजबाग - आगोंद येथे १३ ते १४ मार्च २०१७ दरम्यान ही घटना घडली. डॅनियलीच्या अंगावर सात जखमा आढळून आल्या होत्या. काणकोण पोलिसांनी याच तालुक्यातून विकटला अटक केली होती.

काणकोण पोलिसांनी विकटविरोधात ३७४ पानांचे आरोपपत्र न्यायालयात दाखल केले होते. सुनावणी पूर्ण झाल्यानंतर विकटला या प्रकरणात न्यायालयाकडून दोषी ठरवण्यात आले. आणि अखेर त्याला जन्मठेपेची शिक्षा सुनावण्यात आली होती.