Damodar Saptah Vasco: आठव्या दिवशीही फेरी हाऊसफुल्ल! दामबाबा सप्ताहानिमित्त मोठी गर्दी

वास्को: येथील सप्ताहानिमित्त सात दिवसांसाठी थाटण्यात आलेली फेरीत दुकाने हटविण्यात मुरगाव पालिकेला अपयश आले. आम्ही कोणत्याही स्थितीत सात दिवसांनंतर स्वातंत्र्यपथ व सेंट जोसेफ वाझ मार्ग वाहतुकीस खुला करू, ही गर्जना हवेत विरल्याचे उघड झाले. रविवारी आठव्या दिवशीही फेरी हाऊसफुल्ल ठरली. पालिकेने मात्र बघ्याची भूमिका घेतली.

जिल्हाधिकारी कार्यालयाने फक्त सात दिवस फेरीची परवानगी दिली होती. त्यामुळे फेरीची मुदतवाढ प्रकरण शेकू नये यासाठी मुरगाव पालिकेने शुक्रवारी रात्री ध्वनिक्षेपक लावून विक्रेत्यांनी दुकाने हटवण्याचे आवाहन केले. मुदतवाढ कोणी दिली, अशी विचारणा झाल्यास आवाहन केले होते. पण त्यांनी हटविली नाहीत, यासंबंधीचा पुरावा सादर करण्यात येईल.

शुल्क नव्हे दंड?

यंदा सप्ताह काळात पावसाने उसंत घेतल्याने भाविकांची मोठी गर्दी उसळली. त्यामुळे विक्रेत्यांनी भरपूर व्यवसाय केला. रविवारी सुट्टीमुळे गर्दी उसळली. सोमवारी रक्षाबंधनमुळे दुकाने हटविली जाण्याची शक्यता कमीच आहे. मात्र, या तीन दिवसांचे जागेचे शुल्क मुरगाव पालिका घेणार नाही. शुल्क घेतल्यास तर पालिकेने परवानगी दिली हे स्पष्ट होईल. त्याऐवजी विक्रेत्यांकडून प्रतिदिन हजार रुपये दंड वसूलण्यात येईल, अशी माहिती मिळाली आहे.