पेडणे: भिरोणे येथील सरकारी प्राथमिक शाळेच्या इमारतीचे छप्पर दुरुस्तीसाठी काढल्यामुळे पावसात भिजलेली कागदपत्रे ही पेडणे उपजिल्हाधिकारी कार्यालयातील असल्याचे उघड झाले आहे. त्यात महत्त्वपूर्ण दस्तऐवज तसेच विविध खटल्यांचे निकाल आदी कागदपत्रांचा समावेश आहे.
पेडणे येथील उपजिल्हाधिकारी कार्यालयात आवश्यक जागा नसल्यामुळे २०१७ -१८ मध्ये पेडणेचे तत्कालीन उपजिल्हाधिकारी सुधीर केरकर यांनी तत्कालीन उत्तर गोवा जिल्हाधिकारी नीला मोहनन व शिक्षण खात्याची परवानगी घेउन पेडणे उपजिल्हाधिकारी कार्यालयातील काही कागदपत्रे गडेकरभाटले, भिरोणे येथील सरकारी प्राथमिक शाळा इमारतीच्या एका खोलीत सुरक्षित ठेवली होती.
त्यात कागदपत्रांनी भरलेली काही लोखंडी कपाटे, काही भिंतीला असलेली कपाटे तर कागदपत्रांच्या फाईल्सचे गठ्ठे रचून ठेवण्यात आले होते.
मे महिन्याच्या दुसऱ्या आठवड्यात ऐन पावसाळ्याच्या तोंडावर या शाळा इमारतीचे दुरुस्तीचे काम सार्वजनिक बांधकाम खात्याच्या इमारत बांधकाम विभागाने हाती घेतले. मात्र या इमारतीतील साहित्य तसेच आत राहू दिल्याने गेल्या काही दिवसांत पडलेल्या पावसात हे सर्व साहित्य भिजले आहे.
याबाबत पेडण्याचे उपजिल्हाधिकारी शिवकुमार नाईक यांना विचारले असता, या शाळेतील साहित्याची योग्य निगा घेणे ही सार्वजनिक बांधकाम खात्याच्या इमारत विभागाचे काम होते. परंतु त्यांच्या निष्काळजीपणामुळे हा प्रकार घडलेला आहे. ही कागदपत्रे महत्त्वपूर्ण आहेत. जी कागदपत्रे भिजलेली आहेत, ती कशी वाचवता येतील यासाठी आमचे प्रयत्न सुरू आहेत, असे ते म्हणाले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.