Dabolim: लोकांच्या जीवाशी खेळ! उड्डाण पुलाच्या कामामुळे चालकांना धोका, वास्कोत नियमांची ऐशीतैशी; सळ्यांची धोकादायक वाहतूक

वास्को: दाबोळी - बोगमाळो चौक ते एमईएस चौक दरम्यान उड्डाण पुलाचे काम सुरू असल्याने त्यासाठी लागणारे साहित्य अवजड वाहनांतून नेण्यात येत आहे. तथापी, त्या साहित्यामुळे इतर वाहनांना धोका निर्माण होऊ नये यासाठी कोणतीही खबरदारी घेण्यात येत नसल्याचे दिसून येत आहे. त्यामुळे नागरिक, वाहनचालक संताप व्यक्त करीत आहेत.

या उड्डाण पुलाचे बांधकाम सध्या जोरात सुरू आहे. त्यामुळे काही ठिकाणी महामार्ग वाहतुकीस सहा महिन्यासाठी बंद ठेवण्यात आला आहे. त्या मार्गावरील वाहतूक अंतर्गत रस्त्यांवरून वळविण्यात आली आहे.

वाहनचालकांच्या जीवितेला धोका, मालमत्तेची हानी होऊ नये यासाठी ही खबरदारी घेण्यात आली आहे. तथापी, काही ठिकाणी खबरदारी फक्त देखावा असल्याचे दिसून येते. या उड्डाण पुलासाठी लागणारे साहित्य वाहून नेताना कोणतीही खबरदारी घेण्यात येत नाही.

दोन दिवसांपूर्वी अवजड वाहनांतून मोठ्या प्रमाणात लोखंडी सळ्या नेताना एक दोन सळ्या त्या वाहनाबाहेर आल्या होत्या.