Mopa Airport: मोपा विमानतळ सुरू झाल्‍यानंतर दाबोळीवर विपरीत परिणाम होईल; विमानांचे प्रमाण कमी होऊन आहेत ती मोपाकडे सरकतील, ही भीती अनाठायी ठरली आहे. गोवा सरकारने मोपा विमानतळ सुरू केल्‍याच्‍या पार्श्वभूमीवर ‘एव्‍हिएशन टर्बाईन फ्‍युएल’वरील राज्‍य विक्री कर टक्‍केवारीत 18 वरून 8 टक्‍के अशी घट केल्‍याने अनेक विमान कंपन्‍यांनी गोव्याकडे कूच करणे पसंत केले आहे.
तेलंगणा राज्‍याने ‘एव्‍हिएशन फ्‍युएल टर्बाईन’वरील कर 18 वरून 1 टक्‍क्‍यांवर आणल्‍याने तेथे विमानांचे 70 टक्‍के ट्रॅफिक वाढले होते. विमान कंपन्‍यांचा 60 टक्‍के खर्च विमान इंधनाच्‍या करांवरच खर्च होतो.
मोपा सुरू झाल्‍यानंतरही दाबोळी विमानतळावर सध्‍या दिवसाकाठी 80 पेक्षा जादा विमाने उतरत असून, मोपा आंतरराष्‍ट्रीय विमानतळावर उतरणाऱ्या विमानांची संख्‍या 24 आहे. गेल्‍या वर्षी अपवादात्‍मकदृष्ट्या ‘ऑफ सिजन’मध्‍येही दाबोळीवर दिवसाकाठी 100 पेक्षा अधिक विमाने उतरत होती. हवाई वाहतूक निरीक्षकांनी या घटनेकडे ‘रिव्‍हेन्‍ज टुरिझम’च्‍या अर्थाने पाहिले होते.
कोविडच्‍या काळात सुमारे 2 वर्षे लोक फिरू शकले नव्‍हते. अनेकांना या काळात घरी बंदिस्‍त राहावे लागले. त्यामुळे निर्बंध सैल होताच गोव्याकडे पर्यटकांची रिघ लागली.
स्वस्त इंधनासाठी गोव्याकडे धाव
यंदा पर्यटन हंगामाच्‍या शेवटच्‍या काळातही (जानेवारी संपत आला तरीही) पर्यटकांची गोव्याकडे रिघ लागली आहे. गोव्याकडे येणाऱ्या विमानांची संख्‍या कमी झालेली नाही.
विमानतळ सूत्रांनी दिलेल्‍या माहितीनुसार, गोव्‍यात हवाई इंधन दर कमी असल्‍याने अल्‍प दरात इंधन भरून घेण्‍यासाठी अनेक विमान कंपन्‍यांनी गोव्‍याचा मार्ग निवडला आहे.
मोपा ठरणार ‘ग्रोथ इंजिन’
पुढील पर्यटन हंगामात गोव्याकडे येणाऱ्या विमानांची संख्‍या किमान 50 टक्‍क्‍यांनी वाढेल, अशी शक्‍यता निरीक्षकांनी व्‍यक्‍त केली आहे. दाबोळीवरील विमानसंख्‍या 100 वरून 70 होईल व मोपावर किमान 80 विमाने उतरतील, असा निरीक्षकांचा अंदाज आहे.
मोपा विमानतळ सुरू झाल्‍यानंतर तेथे नागपूर व जयपूर येथून थेट विमाने सुरू झाल्‍याची माहिती आहे. ‘मोपा’चा फायदा सिंधुदुर्गलाही होणार असल्‍याने दोन राज्‍यांना पर्यटनामुळे उभारी मिळेल. त्‍या दृष्‍टीने मोपा ‘ग्रोथ इंजिन’ म्‍हणून नावारूपाला येण्‍याची शक्‍यता आहे.
निर्णय एक, फायदे अनेक
मोपा विमानतळ सुरू झाला तरी दाबोळीवरील विमानसंख्‍या कमी होणार नाही आणि मोपा येथेही नवीन विमाने उतरतील.
या काळात इंधन खर्च वाढला तरी गोव्‍यात कर कमी असल्‍याने पर्यटकांना गोव्‍यात येणे परवडू शकते.
गोव्‍यात विमानांची ये-जा वाढणार आहे व या मार्गावर नजीकच्‍या काळात जी जोड विमाने होती, ती आता वेगवेगळ्या शहरांकडून गोव्‍यात थेट प्रवास सुरू करतील.
त्‍यामध्‍ये रायपूर, अमृतसर व कोची येथून येणाऱ्या विमानांचा समावेश असेल.
दुसऱ्या बाजूला मोपा विमानतळ उत्तरेकडच्‍या मोरजी, हरमल, बागा या किनाऱ्यांना निकट असल्‍याने, शिवाय सिंधुदुर्गातही लवकर पोहोचता येणार असल्‍याने मोपावरील विमानसंख्‍या वाढेल, अशी अपेक्षा आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
