Cyclone Remal : रेमल’मुळे मॉन्सूनला वेग; वादळानंतर ठरणार मॉन्सूनची दिशा

Cyclone Remal Update :

बंगालच्या उपसागरात घोंघावणाऱ्या ‘रेमल’ चक्रीवादळामुळे मॉन्सूनचा प्रवास वेगाने सुरू आहे. बंगालच्या उपसागराच्या आणखी काही भागांत मॉन्सूनने रविवारी मजल मारली आहे.

‘रेमल’ चक्रीवादळ तीव्र झाले आहे.रविवारी मध्यरात्री हे वादळ धडकण्याची शक्यता होती. पश्चिम बंगाल आणि बांगलादेशात चक्रीवादळाचा तडाखा बसण्याची शक्यता आहे. या पार्श्वभूमीवर किनारी भागांत दक्षतेचा इशारा देण्यात आला आहे.

नैॡत्य बंगालच्या उपसागरात शनिवारी (ता. २५) सायंकाळी ‘रेमल’ चक्रीवादळाची निर्मिती झाली. रविवारी तीव्र रूप धारण करणारे चक्रीवादळ पश्चिम बंगालच्या सागर बेटांपासून २१० किलोमीटर, तर कॅनिंगपासून २३० किलोमीटर दक्षिणेकडे उपसागरात घोंघावत होते.

ताशी ९५ ते ११५ किलोमीटर वेगाने चक्राकार वारे वाहणाऱ्या चक्रीवादळाचे केंद्र ताशी १३ किलोमीटर वेगाने जमिनीकडे सरकत होते.

‘वादळानंतर ठरणार मॉन्सूनची दिशा’

वादळी प्रणालीमुळे चाल मिळाल्याने नैॡत्य मोसमी वाऱ्यांनी (मॉन्सून) वाटचाल कायम ठेवली आहे. रविवारी (ता. २६) बंगालच्या उपसागराच्या मध्य आणि ईशान्य भागात मॉन्सूनने प्रगती केली. वादळी प्रणाली निवळल्यानंतर मॉन्सूनच्या पुढील वाटचालीची दिशा ठरणार आहे.