Curti Theft: चोरट्यांचे आव्हान कायम! कुर्टीत फ्लॅट फोडून दोन लाखांचा ऐवज लंपास

Goa Curti Flat Theft News

फोंडा: कुर्टी येथे चोरट्यांनी फ्लॅट फोडून रोख रकमेसह दागिने मिळून सुमारे दोन लाख रुपयांचा ऐवज लंपास केला. ही चोरी रविवारी रात्री झाली. येथील नागा मशीद भागात फ्लॅटमध्ये राहणाऱ्या नसीम बानो यांच्या घरी ही चोरी झाली.

रविवारी नसीम या आपल्या नातेवाइकांकडे गेल्या होत्या, तर वृद्ध पती शेजारील मशिदीत झोपायला गेला होता. सकाळी नसिम या घरी परतल्यानंतर चोरीचा हा प्रकार उघडकीस आला. चोरट्यांनी पाळत ठेवून ही चोरी केली. बंद फ्लॅटची कडी तोडून आत प्रवेश केला व आतील कपाट फोडून रोख पंधरा हजार रुपये तसेच काही दागिने मिळून एकूण दोन लाख रुपयांचा ऐवज लंपास केला.

विशेष म्हणजे दोनच दिवसांपूर्वी फोंडा पोलिसांनी मंदिर व घरफोड्या करणाऱ्या पाचजणांना पकडल्यानंतर ही चोरी करण्यात आली आहे. त्यामुळे पोलिसांसमोर चोरट्यांना पकडण्याचे आव्हान कायम आहे. पोलिसांनी या चोरी प्रकरणी पंचनामा केला. पुढील चौकशी सुरू आहे.