Crocodile In Goa: करमळी तळ्यात '१०० हून अधिक मगरी' असल्याचा दावा! स्थानिक चिंतातुर

Crocodiles At Carambolim Lake

तिसवाडी: पाणथळ म्हणून अधिसूचित केलेल्या करमळी तळ्यात मोठ्या प्रमाणांत मगरींची संख्या वाढल्याने शेतकरी आणि स्थानिक नाराज आहेत. तळाचा ताबा अजूनही वन खात्याकडे असून इतर ठिकाणी पकडण्यात आलेल्या मगरी येथे तळात सोडल्याने प्रकरण हाताबाहेर जाण्याच्या मार्गावर असल्याने एखादी घटना झाल्यानंतर सरकारला जाग येणार का, अशी चिंता व्यक्त केली जात आहे.

तळ्यात गेलेल्या एक म्हशीला मगरीने मारल्याची घटना घडली होती. या तळात सभोवतालच्या म्हशी जात असल्याने या प्रकारचे हल्ले वाढण्याची शक्यता वर्तवली जात आहे. त्यामुळे शेतकऱ्यांमध्ये चिंता व्यक्त केली जात आहे. यावर त्वरित उपाय काढणे गरजेचे असल्याची मागणी जोरु धरु लगली आहे. तळ्याच्या परिसरात ये-जा करणाऱ्या शेतकऱ्यांना धोका निर्माण झाला आहे. जवळच्या शेतातसुद्धा काम करताना भिती निर्माण झाली आहे. संबंधितांनी त्वरित लक्ष द्यावे, अशी मागणी शेतकऱ्यांनी केली आहेत.

अजूनही ताबा वनखात्याकडेच

करमळी तळे पाणथळ म्हणून अधिसूचित होऊन दोन वर्ष उलटले तरी देखील तळाचा ताबा वन खात्याकडे असल्याची माहिती समोर आली आहे. पूर्वी या तळ्यात शेती केली जात होती, आत्ता देखील काही शेतकरी किनारी शेती करतात, परंतु वन खात्यामुळे त्यांना अडचणींना समोर जावे लागत आहे. यावर तोडगा काढण्यासाठी हल्लीच करमळी पंचायतीने तळे व्यवस्थापन समिती गठित करण्याचा ठराव ग्रामसभेत संमत केला होता.