Crocodile in Vasco: वास्कोतील वाड्डेमध्ये दुसऱ्यांदा मगरीचे दर्शन; स्थानिकांनीच सापळा रचत केले बचावकार्य

Crocodile Rescue in Vasco: राज्यात मुसळधार पावसाला सुरुवात झाली असून नद्या-नाले, तलाव तुडुंब भरले आहेत. परिणामी पाण्यातील जीव लोकवस्तीत येण्याच्या घटनाही समोर येत आहेत. मागील दोन दिवसांपूर्वी वास्कोमधील वाड्डे तलाव परिसरात एक मोठी मगर दिसली होती.

या घटनेनंतर परिसरातील नागरिकांनी तिथे सापळा रचला. त्यानंतर आज बुधवारी पहाटे प्राणी बचावकर्ते ग्रेसियस कुतिन्हो यांच्या नेतृत्वाखाली स्थानिक तरुणांनी तलावात दीड मीटर लांबीच्या मगरीला पकडले.

स्थानिकांनी सांगितल्याप्रमाणे याच भागात दोन दिवसांपूर्वी तलावाच्या परिसरात रस्त्याच्या कडेला एक मोठी मगर दिसली होती.

मोठ्या आकाराची मगर आणि आणखी एक लहान मगर अजूनही तलावात असून भागातील स्थानिकांकडून त्यांना पकडण्याचे प्रयत्न सुरू आहेत. आज पकडण्यात आलेल्या मगरीला वनविभागाच्या ताब्यात देण्यात आले आहे.