Colvale Jail सतत वादाच्या भोवऱ्यात असलेल्या कोलवाळ मध्यवर्ती कारागृहातून बुधवारी (ता.7) एका कैद्याने तुरुंगातून पलायन करण्याचा अयशस्वी प्रयत्न केला होता. प्रदीप खाल्को असे या कैद्याचे नाव आहे. त्याच्या विरोधात कोलवाळ पोलिस स्थानकात गुन्हा नोंद झाला आहे.
पोलिस उपअधीक्षक जीवबा दळवी यांनी दिलेल्या माहितीनुसार, ही घटना बुधवारी (ता.7) दुपारी 3.10 वाजता घडली होती. प्रदीपला नवीन प्रवेश ब्लॉकमध्ये ठेवले होते. यावेळी ताजी हवा खाण्यासाठी कैद्यांना थोडावेळ बाहेर सोडले जाते.
तेव्हा प्रदीप याने या संधीचा फायदा घेत नवीन प्रवेश ब्लॉकच्या आतील संरक्षक भिंतीवर चढून पळून जाण्याचा प्रयत्न केला. यासाठी त्याने तळमज्यावरील छताचा व गेटचा आधार घेतला. परंतु, त्याचा हा प्रयत्न फसला व दक्ष पोलिसांनी त्याला पकडले.
यावेळी तुरुंगाचे नियम मोडल्याप्रकरणी व पळून जाण्याचा प्रयत्न केल्याप्रकरणी कोलवाळ पोलिसांनी कैदी प्रदीप खाल्को याच्याविरोधात गुन्हा नोंद केला आहे.
कारागृहाचे जेलर मुकुंद गावस यांनी कोलवाळ पोलिस स्थानकात याप्रकरणी तक्रार दिली. प्रदीप हा अंडर ट्रायल कैदी आहे. तीन दिवसांपूर्वीच त्याला या कारागृहात दाखल केले होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.