Cotigao: विश्रांतीगृह नाही चेकनाक्याचा संशय! खोतीगावातील बांधकाम थांबवा; माजी सरपंचांचे जिल्हाधिकाऱ्यांना निवेदन

काणकोण: पिंपळामळ-खोतीगांव येथे वन खात्याने चालविलेले बांधकाम त्वरित बंद करावे, अशी मागणी करणारे निवेदन खोतीगावचे माजी सरपंच उमेश ऊर्फ दया गावकर यांनी उपजिल्हाधिकारी मधू नार्वेकर यांना सादर केले आहे.

गावकर यांनी या निवेदनात म्हटले आहे की, या बांधकामाला ग्रामस्थांचा विरोध आहे. २३ फेब्रुवारीला लोकांनी एकत्रित येऊन हे काम बंद करण्यास भाग पाडले होते. परंतु विरोध असतानाही २१ मार्चपासून या बांधकामाला पुन्हा सुरवात केली आहे.

या ठिकाणी विश्रांती गृह उभारण्यात येत असल्याचे सांगण्यात येत असले तरी या ठिकाणी चेकनाका उभारण्यात येत असल्याचा स्थानिकांना संशय आहे. या ठिकाणी चेकनाका उभारल्यास ग्रामस्थांसाठी अडचणीचे ठरणार असून स्थानिकांची सतावणूक होण्याची शक्यता आहे, त्यामुळे हे बांधकाम रोखावे, अशी मागणी गावकर यांनी केली आहे.

खोतीगाव अभयारण्य कक्षेत पिंपळामळ, येडा-खोतीगाव येथे वनजमिनीत सुरू असलेले बांधकाम रहिवाशांनी विरोध करून बंद पाडले होते . त्यानंतर सभापती डॉ. रमेश तवडकर यांनी घटनास्थळी येऊन जेसीबीच्या साहाय्याने सुरू असलेले खोदकाम बंद करण्याची सूचना केली होती.