'फुर्तादो हॉटेल पाडण्याचा लाखोंचा खर्च मालकाकडूनच वसूल करावा'

मडगाव : सीआरझेड कायद्याचा भंग करून सेर्णाभाटी कोलवा येथे बांधण्यात आलेले फुर्तादोज हे बेकायदेशीर हॉटेल पाडण्यासाठी 5.75 लाखांचा खर्च आला होता. हा खर्च बांधकाम मालकाकडूनच वसूल करुन घ्यावा, अशी मागणी कोलवा सिव्हिक फोरमच्या निमंत्रक ज्यूडीत आल्मेदा यांनी दक्षिण गोवा जिल्हाधिकाऱ्यांकडे केली आहे.

या बांधकामाच्या विरोधात आल्मेदा यांनी सीआरझेड प्राधिकरणाकडे तक्रार केली होती. या तक्रारीत तथ्य आढळून आल्याने हे बांधकाम पाडून टाकण्याचा आदेश दिला होता. त्यानंतर हे संपूर्ण हॉटेल जमीनदोस्त केले होते.

या कामासाठी प्रशासनाला 5.75 लाख खर्च आला होता. तो खर्च फुर्तादो यांनी भरावा यासाठी नोटीसही पाठविण्यात आली होती. मात्र नंतर दक्षिण गोव्याच्या उप जिल्हाधिकाऱ्यांनी एका आदेशाद्वारे हॉटेल मालकाला ही रक्कम भरण्यापासून सूट दिली होती.

या आदेशाला हरकत घेत आल्मेदा यांनी काल शुक्रवारी दक्षिण गोवा जिल्हाधिकारी रुचिका कटियाल यांच्यासमोर तक्रार दाखल करत उपजिल्हाधिकारी ज्योती कुमारी यांनी दिलेला हा आदेश बेकायदेशीर असून तो त्वरित रद्द करून ही रक्कम बांधकाम मालकांकडून वसूल करून घ्यावी, अशी मागणी केली आहे.

ज्याने कायदा धाब्यावर बसवून बेकायदेशीर बांधकाम केले त्याला अशी सूट मिळाल्यास ती त्याला दिलेली बक्षिसी ठरणार असून त्यामुळे सर्वसामान्य करदात्यांच्या रकमेचा बेकायदेशीर कामासाठी वापर केल्यासारखे होईल, असे आल्मेदा यांनी म्हटले आहे.

दरम्यान अशी बेकायदेशीर बांधकामे पाडण्यासाठी सीआरझेड प्राधिकरणाने दुसऱ्या यंत्रणांचा वापर न करता यासाठी स्वतःची स्वतंत्र यंत्रणा उभारावी अशी मागणी केली आहे.