Mopa News: पाणीपातळी वाढली; कडशीत पंधरा कुटुंबांचा संपर्क तुटला

नदी तसेच ओहोळाला आलेल्या पुरामुळे कडशी, मोपा येथील पंधरा कुटुंबांचा संपर्क तुटला आहे. दरम्यान, अडकून पडलेल्या काही लोकांना पेडणे अग्निशामक दलाच्या जवानांनी पलीकडे पोचविले.

नदी तसेच ओहोळाला येणाऱ्या पुरामुळे दरवर्षी या गावाचा संपर्क तुटतो. त्यामुळे येथे राहणाऱ्या पंधरा कुटुंबांना मोठ्या कठीण प्रसंगाला सामोरे जावे लागते. या कुटुंबांत वृध्द, विद्यार्थी, नोकरी व्यवसाय करणारे असल्याने त्यांची मोठी गैरसोय होते.

काही वर्षांपूर्वी सरकारने या नदीवर दोन पाइप घालून साकव उभारला होता. परंतु हा साकव उभारला तेव्हा तिराळी धरण प्रकल्प व मोपा विमानतळ पूर्ण झाले नव्हते.

मोपा पठारावरील पाणी नदीला मिळते तसेच तिराळीचेही पाणी येते त्यामुळे नदी व ओहोळाची पातळी वाढते व पूर येतो. त्यामुळे मध्ये वसलेल्या कडशी गावाचा संपर्क तुटतो.

या भागातून मोपा गावात जाण्यासाठी एक ते दीड किलो मीटरची वाट आहे, परंतु तीही पावसाळ्यात बंद होते. येथील पुलाची उंची वाढविल्यास येथील लोकांची गैरसोय दूर होऊ शकते. आमदार प्रवीण आर्लेकर यांनी अनेकदा याबाबत आश्‍वासन दिले आहे.