Goa Rain Update: आज रेड अलर्ट जारी; वाळपई, साखळीसह सांगेत पावसाचे शतक

राज्यात मुसळधार पावसाचे धुमशान सुरूच आहे. ४ जून रोजी मॉन्सूनला सुरवात झाली. तेव्हापासून आतापर्यंत अवघ्या ४४ दिवसांत वाळपई, सांगे आणि साखळी येथे पावसाने इंचांचे शतक पूर्ण केले. हवामान खात्याच्या वेधशाळेने उद्याही (ता.१९) राज्यात ‘रेड अलर्ट’ जारी केला आहे.

राज्यात संततधार पावसामुळे पडझड, नुकसानीचे सत्र सुरूच असून कुठ्ठाळी जंक्शनजवळ मोठे भूस्खलन होऊन तीन दुचाकी मातीखाली गाडल्या गेल्या. पावसामुळे जनजीवन विस्कळीत झाले. शहरे, गावांतील सखल भागांमध्ये पाणी साचल्याने लोकांची तारांबळ उडाली. ग्रामीण भागात अनेक नद्यांना उधाण आले असून नद्यांचे पाणी रस्त्यांवर आल्याने बऱ्याच गावांशी संपर्क तुटला आहे.

जून महिन्यात सरासरी पावसाच्या तुलनेतही पाऊस कमी होता; परंतु जुलैच्या सुरवातीपासून पावसाने जोर धरला आहे. तो अद्याप कायम आहे.

उत्तर गोव्यात आतापर्यंत एकूण म्हणजेच ९०.५० इंच तर दक्षिण गोव्यात ८५.४३ इंच पावसाची नोंद करण्यात आली आहे. उत्तर गोव्यात सरासरीच्या तुलनेत ५०.१ टक्के तर दक्षिण गोव्यात ४७ टक्के अधिक पावसाची नोंद झाली. अग्निशमन दलाला राज्यभरातून सुमारे ४० कॉल्स आले. त्यांना दलाच्या जवानांनी मदत केली. सुमारे ९० टक्के घटना झाडे पडण्याच्या घडल्या, तसेच संरक्षक भिंती कोसळणे आदी घटना नोंदविण्यात आल्या.

कोठे काय घडले?

पाटो-पणजी भागात रस्त्यावर पाणी साचल्याने बराच काळ वाहतूक खोळंबली.

पणजी चर्च स्क्वेअरजवळ कार व दुचाकीवर भले मोठे झाड पडले. सुदैवाने चौघे प्रवासी बचावले.

धामशे-सत्तरी येथे ‘बीएसएनएल’ने केबलसाठी खोदलेल्या चरांमुळे ८०० मीटर रस्ता खचला.

अनमोड घाटात दूधसागर देवालयाजवळ सकाळी दरड कोसळली होती.

सायंकाळपर्यंत ती माती हटवून मार्ग वाहतुकीस केला खुला.

रगाडा नदीला पूर आल्याने साकोर्डा-मधलावाडा-बोळकर्णे रस्ता पाण्याखाली.

दाबोळवाडा-शापोरा येथे यशवंत गोवेकर यांच्या घरावर झाड पडून दोन लाखांचे नुकसान.

आमरखणे-केरी येथे संरक्षक भिंत कोसळल्यानंतर रस्ताही खचला.

डिचोलीत घरावर कोसळले झाड. मातेसह मुलगा सुरक्षित.