मये येथे ग्राहक हक्काविषयी जागृती

डिचोली: राष्ट्रीय ग्राहक हक्कदिनाचे औचित्य साधून डिचोली नागरी पुरवठा कार्यालयातर्फे मये येथे ग्राहक हक्काविषयी जागृती करण्यात आली. या कार्यक्रमास प्रमुख पाहुण्या म्हणून ग्राहक हक्क विषयावरील अभ्यासक ॲड. विद्या पाटील उपस्थित होत्या. यावेळी डिचोलीचे (Bicholim) नागरी पुरवठा निरीक्षक सूरज शेट्ये आणि विजयानंद शिक्षण प्रसारक मंडळाचे संचालक रामनाथ चोडणकर उपस्थित होते.

ॲड. विद्या पाटील यांनी यावेळी ग्राहक (Customer) हक्काविषयी मार्गदर्शन करताना ग्राहकांनी जागृत रहावे, असे आवाहन केले. सूरज शेट्ये यांनी ग्राहक हक्कासंबंधी नागरी पुरवठा खात्यातर्फे राबविण्यात येणाऱ्या उपक्रमांची माहिती दिली. यावेळी ‘ग्राहक हक्क’ या विषयावर घेण्यात आलेल्या प्रश्नमंजुषा स्पर्धेत (Competition) संकल्प गडेकर, रमेश पत्रे आणि प्रसाद गावकर यांना बक्षिसे प्राप्त झाली. नागरी पुरवठा खात्याचे उपनिरीक्षक आवेलिओ डिसोजा यांनी सूत्रसंचालन केले. मनमोहन गावकर यांनी आभार मानले.