'जाहिरात माध्यमातून ग्राहकांची फसवणूक'

सासष्टी: जाहिरात माध्यमातून ग्राहकांची दिशाभूल व फसवणूक केली जाते. अशा प्रकारच्या जाहिरातींविरुद्ध आवाज उठवणे, तक्रार करणे वगैरे कायदे सरकारने तयार केले आहेत. त्यासाठी जनजागृती आवश्यक आहे, असे आवाहन अहमदाबाद येथील ग्राहक शिक्षण व संशोधन केंद्राच्या प्रतिनिधी अनुषा अय्यर व अनिंदिता मेहता यांनी केले.

गोवाकॅन, ग्राहक कल्याण सेलने आज बोर्डा येथील सरकारी महाविद्यालयात ग्राहकांची दिशाभूल व फसवणूक या विषयावर परिसंवाद आयोजित केला होता. त्यावेळी त्या बोलत होत्या. गोव्यातील ग्राहकांमध्ये जागृती करण्यासाठी हा परिसंवाद आयोजित केल्याचे गोवाकॅनचे निमंत्रक रोलांड मार्टिन्स यानी पत्रकारांना सांगितले.

या परिसंवादात बोर्डा, काणकोण व केपे येथील सरकारी महाविद्यालय तसेच नावेली येथील रोझरी महाविद्यालयाच्या शिक्षकांनी व विद्यार्थ्यांनी भाग घेतला. अन्न व औषध प्रशासन खात्याने नव्याने भरती केलेले कर्मचारीही यावेळी उपस्थित होते.

गोव्याची लोकसंख्या १६ लाख असली तरी ८० लाखहून अधिक पर्यटक गोव्यात येतात. गोव्याबद्दल जाहिरातींद्वारे उलटसुलट माहिती पर्यटकांना दिली जाते व पर्यटक त्यास भुलतात. गोव्यातील हॉटेलवाले पर्यटकांना कसे लुबाडतात, याच्या अनेक तक्रारी आमच्याकडे आल्या आहेत. काही तक्रारींचे निवारण करण्यात आले आहे; तर काही प्रकरणांची चौकशी सुरू आहे. बसस्थानकासारख्या सार्वजनिक ठिकाणी खाद्यपदार्थ सुरक्षितपणे लोकांना पुरवले जातील, याची खबरदारी घेण्यात येईल. तसेच लोकांना कायदे व नियमांची माहितीही दिली जाईल.

- रोलांड मार्टिन्स, गोवा कॅन निमंत्रक