Goa Politics: ‘तिसरा जिल्हा’ ही काँग्रेसची दूरदृष्टी: युरी आलेमाव

Goa Politics: तिसऱ्या जिल्ह्याची निर्मिती हा काँग्रेसच्या जाहीरनाम्याचा भाग आहे. मुख्यमंत्री डॉ. प्रमोद सावंत यांच्या नेतृत्वाखालील भाजप सरकारने गोव्यासाठी कॉंग्रेसचे एक दूरदृष्टीचे धोरण लागू करण्यासाठी पावले उचलली आहेत, याचा मला आनंद आहे.

तिसरा जिल्हा फोंडा, धारबांदोडा, सत्तरी आणि सांगे तालुक्यातील नागरिकांना मदतगार ठरेल, असे विरोधी पक्षनेते युरी आलेमाव यांनी म्हटले आहे. तिसरा जिल्हा निर्मितीच्या विविध पैलूंचा अभ्यास करण्यासाठी समिती स्थापन करण्याच्या शासनाच्या निर्णयावर प्रतिक्रिया व्यक्त करताना युरी आलेमाव यांनी भाजपला अखेर काँग्रेस पक्षाच्या धोरणांचे महत्त्व कळायला लागले आहे, असा टोला लगावला.

प्रभावी प्रशासन आणि नागरिकांना सुलभता देण्यासाठी गोव्यात तिसरा जिल्हा निर्माण करण्याच्या आमच्या जाहीरनाम्यातील आश्वासनावर भाजपच्या प्रमुख नेत्यांनी टीका करून सदर आश्वासनाची खिल्ली उडवली होती. अखेर गोवा आणि गोमंतकीयांच्या भल्यासाठी काँग्रेस पक्षाचे धोरणच योग्य असल्याचे त्यांच्या लक्षात आले आहे, असा दावा युरी आलेमाव यांनी केला.

शासनाकडून नवीन जिल्हा प्रशासनाला पायाभूत सुविधांची योग्य संसाधने तसेच मनुष्यबळ उपलब्ध करून देणे महत्त्वाचे आहे. यामुळे नागरिकांना विविध सेवा प्रभावीपणे पोहोचण्यास मदत होईल. फोंडा, धारबांदोडा, सत्तरी आणि सांगे तालुक्यांतील लोकांना तिसऱ्या जिल्ह्याचा लाभ मिळेल, असे युरी आलेमाव यांनी सांगितले.