भाजपला पराभूत करण्याची क्षमता काँग्रेसमध्ये आहे; पी. चिदंबरम

Goa Politics: काँग्रेसचे गोवा निवडणूक प्रभारी पी. चिदंबरम पणजीमध्ये पत्रकारांशी संवाद साधताना म्हणाले, भाजपला (BJP) पराभूत करण्यासाठी सर्वांनी एकत्रित यावे, या काँग्रेसच्या (Congress) आवाहनाला गोवा फॉरवर्डचे (Goa Forward) विजय सरदेसाई यांनी पुढे येऊन काँग्रेस पक्षाला पाठिंबा व्यक्त केला आहे. या पाठिंब्याला काँग्रेस नेते राहुल गांधी (Rahul Gandhi) यांनी संमती दर्शवली आहे. मात्र, या पुढील बाबी स्थानिक नेते ठरवतील.

भाजपला पराभूत करण्याची क्षमता काँग्रेसमध्ये असून 2022 च्या निवडणुकीमध्ये (Election) काँग्रेस भाजपला नक्की पराभूत करेल. पक्षांनी एकत्र येऊन काँग्रेसने त्यांचे नेतृत्व करावे, असे शिवसेना खासदार संजय राऊत यांनी केलेल्या वक्तव्याचे चिदंबरम यांनी समर्थन केले आहे. भाजपला पराभूत करण्यासाठी आणि देशहितासाठी सर्वांनी एकत्रित येणे महत्त्वाचे आहे. यासाठी काँग्रेसचे प्रयत्न सुरू असून टाळी दोन्ही हातांनी वाजवावी लागते, असा मार्मिक टोलाही चिदंबरम (P Chadambaram) यांनी हाणला.

पक्षांतर हा कलंक

गोव्यासाठी पक्षांतर हा कलंक असून राजकीयदृष्ट्या तो वेदनादायक आहे. त्यामुळे कोणत्याही परिस्थितीत पक्षबदलूंना काँग्रेसची उमेदवारी मिळणार नाही. लोकांनीही अशा दलबदलू लोकांना लक्षात ठेवून पराभूत करावे, असे आवाहन त्यांनी केला आहे. एका पक्षाच्या तिकिटावर निवडून येऊन दुसऱ्या पक्षात जाणे, हा जनतेने व्यक्त केलेल्या मताचा अनादर आणि विश्वासघात आहे, असेही चिदंबरम म्हणाले.

पक्षांतरबंदी कायदा सदोष

पक्षांतरबंदी कायदा हा पळवाटा असणारा, सदोष आणि त्रुटींनी भरलेला असून 2024 मध्ये केंद्रात काँग्रेसचे सरकार आल्यावर त्यातील त्रुटी काढून नवा पक्षांतर बंदी कायदा केला जाईल, अशी माहिती चिदंबरम यांनी यावेळी दिली.