'मोपा आणि मये आंदोलनप्रकरणी सरकार असंवेदनशील'

पणजी : राज्यातील रस्त्यांची डागडुजी, जनतेला स्वच्छ आणि नियमित पाणीपुरवठा करणे हे सरकारचे कर्तव्य आहे. मात्र मूलभूत मागण्यांसाठी लोकांना रस्त्यावर उतरण्याची पाळी आणली आहे. भाजप सरकार हे असंवेदनशील असल्याची टीका कुंकळ्ळीचे आमदार युरी आलेमाव यांनी केली. काळजीवाहू सरकारने यामध्ये हस्तक्षेप करत मोपा येथील कामगारांना त्यांचे प्रलंबित वेतन तसेच मये शेतकऱ्यांना पाणीपुरवठ्याची मागणी पूर्ण करावी, असेही ते म्हणाले.

मये (Mayem) येथे काल बुधवारी आंदोलनकर्त्याना झालेली अटक तसेच मोपा येथे कामगारांनी केलेल्या आंदोलनाचा आमदार आलेमाव यांनी निषेध केला. रस्त्यांची डागडुजी आणि अखंडित पाणी पुरवठ्याच्या मागणीसाठी आंदोलन करणाऱ्या मयेच्या सरपंच, रहिवाशी, एका छाया पत्रकार यांना झालेली अटक दुर्देवी असून मुख्यमंत्र्यांनी त्वरित हस्तक्षेप करावा, अशी मागणीही काँग्रेसच्या (Congress) युरी आवेमाव यांनी केली.

असंवेदनशील आणि काळजीवाहू भाजप सरकारचा जनतेप्रती निष्काळजीपणा चालूच असून, कष्टकरी मोपा विमानतळ (Mopa Airport) बांधकाम कामगारांना पगार न देता उग्र आंदोलन करण्यास भाग पाडले. मुख्यमंत्र्यांनी याची दखल घ्यावी आणि सर्व कामगारांचा पगार त्वरित देण्याचे आदेश द्यावेत, अशी मागणी युरी आलेमाव यांनी केली आहे. कॉंग्रेसचे बहुसंख्य आमदार हे तरुण असून, आम्ही सर्वजण संघटितपणे गोमंतकीयांचे प्रश्न सोडविण्यासाठी आणि लोकांना न्याय मिळवून देण्यासाठी कार्यतत्पर राहणार आहोत, असे युरी आलेमाव यांनी सांगितले.