Mormugao Fort: ऐतिहासिक 'मुरगाव किल्ल्याचे' होणार पुनर्निर्माण! मुख्यमंत्री सावंतांनी गुणवत्तापूर्ण कामाचा दिला विश्वास

CM Pramod Sawant Visits Mormugao Fort

पणजी: मुख्यमंत्री डॉ. प्रमोद सावंत यांनी गुरुवारी मुरगाव किल्ल्याला भेट देऊन पाहणी केली. पुरातन महत्त्व असलेल्या या ऐतिहासिक किल्ल्याचे जतन आणि पुनर्निर्माण कार्य हाती घेण्यात येणार असल्याचे त्यांनी सांगितले. हे काम पुढील दोन वर्षांत पूर्ण करण्याचे उद्दिष्ट ठेवण्यात आले आहे.

मुख्यमंत्र्यांनी सांगितले की, या कामासाठी पुरातत्त्व विभाग सध्या सर्वेक्षण करत असून या सर्वेक्षणातून किल्ल्याचे प्राचीन स्वरूप कायम ठेवत त्याचे पुनरुज्जीवन करण्यास मदत होईल. या प्रक्रियेत किल्ल्याच्या ऐतिहासिक रचनेचे दस्तावेजीकरण, जुने अवशेष जपणे आणि पर्यटकांसाठी या ठिकाणाचे महत्त्व अधोरेखित करणारी माहिती समाविष्ट करण्याची शक्यता आहे.

मुख्यमंत्री म्हणाले की, मुरगाव किल्ल्याचे नूतनीकरण झाल्यानंतर त्याचे पर्यटकांना आकर्षित करण्याचे महत्त्व खूपच वाढेल, ज्यामुळे गोव्यातील पर्यटनात लक्षणीय वाढ होईल. या किल्ल्याचा समृद्ध वारसा, त्याचे प्राचीन वास्तुशिल्प आणि समुद्रकिनारा यामुळे गोव्यातील पर्यटनात नवीन आकर्षण निर्माण होईल.

हे नूतनीकरण कार्य उत्तम प्रतीचे आणि टिकाऊ असेल, ज्यात किल्ल्याच्या ऐतिहासिक मूलभूत रचनेला हानी पोहोचणार नाही याची काळजी घेतली जाईल. पुरातत्त्व विभाग आणि संबंधित विशेषज्ञांच्या मदतीने हे काम गुणवत्तापूर्ण पद्धतीने आणि वेळेत पूर्ण होईल, असे म्हणाले.

किल्ल्याच्या परिसरात पर्यटनविषयक सुविधा, स्थानिकांच्या सहभागाने पर्यटकांसाठी सोयी-सुविधा वाढविणे, ऐतिहासिक माहिती देणारे फलक, आणि स्वच्छता व्यवस्थापन यासारख्या उपाययोजना आखण्यात येतील, जेणेकरून पर्यटन अनुभव अधिक समृद्ध होईल, असे ते म्हणाले.

आमोणकरांनी वेधले होते लक्ष

स्थानिक आमदार संकल्प आमोणकर यांनी विधानसभेच्या पावसाळी अधिवेशनात हा विषय उपस्थित केला होता. मुरगाव बंदर प्राधिकरणाने किल्ल्याकडे जाणारा मार्ग रोखल्याचा विषयही चर्चेत आणला होता. पुरातत्त्वमंत्री सुभाष फळदेसाई यांनी तेथे भेट देऊन चर्चेअंती तो प्रश्न सोडवला होता. मुख्यमंत्र्यांच्या आजच्या भेटीवेळी पुरातत्त्व संचालक नीलेश फळदेसाई उपस्थित होते.