Pramod Sawant: पंढरपुरात गोमंतकीयासाठी भक्त निवास, सोलापूर प्रशासनाने द्यावी जागा; मुख्यमंत्र्यांची मागणी

मुख्यमंत्री डॉ. प्रमोद सावंत यांनी आज पंढरपूर येथे श्री विठ्ठल-रुक्मिणी मंदिरात मनोभावे दर्शन घेतले. आळंदी येथून आलेल्या संतश्रेष्ठ ज्ञानेश्वर महाराज पालखीचे दर्शनही घेतले.

राज्याच्या विकासासाठी, लोकांना आनंदी, सुखी, समाधानी ठेव, अशी प्रार्थना त्यांनी केली. पंढरपूर येथील विठ्ठल रुक्मिणीच्या दर्शनासाठी गोवा राज्यातून लाखो भाविक दरवर्षी आषाढी कार्तिकीच्या निमित्ताने येतात. येथे येणाऱ्या गोव्यातील भाविकांसाठी आता गोवा सरकार भक्तनिवास बांधणार आहे.

यासाठी सोलापूर जिल्हा प्रशासनाने जागा उपलब्ध करुन द्यावी, अशी मागणी खुद्द मुख्यमंत्री डॉ. प्रमोद सावंत यांनी केली आहे. जागा उपलब्ध झाल्यानंतर गोवा सरकार त्या ठिकाणी सर्व सोयी सुविधांनी युक्त असे भक्तनिवास बांधेल. भाजपचे प्रदेश सरचिटणीस. नरेंद्र सावईकरही उपस्थित होते. मंदिर समितीचे कार्यकारी अधिकारी राजेंद्र शेळके यांच्या हस्ते शाल व श्री विठ्ठल-रुक्मिणीची मूर्ती देवून मुख्यमंत्री डॉ. सावंत यांचा सत्कार करण्यात आला.