पर्यटनासाठी गोमंतकीयांच्या आरोग्याशी खेळ

पणजी : जगभरात ओमिक्रॉन या कोरोना व्हेरियंटचे थैमान सुरू असताना राज्यातही या व्हेरियंटने शिरकाव केला असून एक रुग्ण सापडला आहे. चिंतेची बाब म्हणजे, संक्रमण दर (पॉझिटिव्हिटी रेट) दररोज वाढत आहे. अशा पार्श्वभूमीवर तज्ज्ञ समितीने दिलेल्या शिफारशी डावलून पर्यटन हंगामाचे निमित्त पुढे करून राज्यात तूर्तास रात्रीची संचारबंदी ( Goa Restrictions) (नाईट कर्फ्यू) लावणार नसल्याची माहिती मुख्यमंत्री डॉ. प्रमोद सावंत यांनी दिली आहे.

राज्यातील संक्रमण दर असाच वाढत राहिला तर कृती दलाची सोमवार, 3 जानेवारीला बैठक बोलावली असून या बैठकीमध्ये नाईट कर्फ्यूचा (Night Curfew) पुढील निर्णय घेतला जाणार आहे. तोपर्यंत मोठे कार्यक्रम, लग्न सोहळे, पार्टी टाळावी, वातानुकूलीत सभागृहांऐवजी खुल्या जागेत कार्यक्रम घ्यावेत, असे आवाहनही मुख्यमंत्र्यांनी केले आहे. सध्या राज्यातील 94 टक्के लसीकरण पूर्ण झाले असून उरलेल्या 6 टक्के लोकांनी तातडीने लस घ्यावी, अन्यथा हे लसीकरण सक्तीचे केले जाईल, असेही मुख्यमंत्र्यांनी स्पष्ट केले.

संक्रमण दर जास्त, तरीही प्रशासन ढिम्म

तज्ज्ञ समितीच्या शिफारशीनुसार सक्रिय रुग्णांची संख्या हजाराच्या वर गेल्यास आणि संक्रमण दर 3.5 झाल्यास निर्बंधांची (Restriction) आवश्यकता असून सरकारने टप्प्या-टप्प्याने निर्बंध लादणे गरजेचे आहे. सोमवारी हा दर 3.6 तर मंगळवारी 4.6 संक्रमण दर होता. त्यामुळे गेल्या दोन दिवसांमध्ये संक्रमण दर जास्तच आहे. हा संक्रमण दर या आठवडाभरात असाच राहिला किंवा जास्त झाल्यास कडक निर्बंध लावण्याशिवाय सरकारपुढे पर्याय राहणार नाही.

एकही रुग्ण इस्पितळात दाखल नाही

आतापर्यंत 1 लाख 80 हजार 229 लोकांना कोरोनाची (Corona) बाधा झाली असून यापैकी 1 लाख 76 हजार 174 रुग्ण बरे झाले आहेत. हे रुग्ण बरे होण्याचे प्रमाण 97.75 टक्के इतके आहे. जगभर ओमिक्रॉनने (Omicron) थैमान घातलेले असताना राज्यात बाधित आणि सक्रिय रुग्णांचे प्रमाण वाढत आहे, ही चिंतेची बाब आहे. त्यामुळे राज्यात पुन्हा कोरोनाचा उद्रेक होते आहे की काय? अशी भीती निर्माण झाली आहे. सध्या राज्यात 535 रुग्ण सक्रिय असून गेल्या 24 तासांत कोरोनामुळे एका रुग्णाचा मृत्यू झाल्याने बळींचा आकडा 3,520 झाला आहे. मात्र, गेल्या 24 तासांत कोणालाही उपचारासाठी रुग्णालयात भरती केलेले नाही. मंगळवारी दिवसभरात 2,776 संशयित रुग्णांच्या चाचण्या केल्या. त्यापैकी 112 जणांना कोरोनाची लागण झाली.